काठमाडौं । नेकपा (मसाल) का महामन्त्री मोहनविक्रम सिंह ८९ वर्षमा प्रवेश गर्नुभएको छ ।
विस. १९९२ वैशाख ३ गते जन्मनुभएका सिंह हालका राजनीतिज्ञमध्ये सबैभन्दा वरिष्ठ नेता हुनुहुन्छ ।
२००७ सालको राणाविरोधी आन्दोलनमा सामेल हुनुभएका सिंह २०१० सालदेखि नै कम्युनिष्ट पार्टीको नेतृत्वदायी भूमिकामा रहनुभएको छ ।
प्युठानमा कम्युनिष्ट पार्टीको स्थापना र किसान आन्दोलनका अग्रज सिंह हजारौं कम्युनिष्ट कार्यकर्ताका प्रशिक्षकसमेत हुनुहुन्छ ।
सत्तासँग टाढै रहेर जहिल्यै देश र जनताको पक्षमा संघर्ष गर्न रुची राख्ने उहाँ अग्रज साहित्यकारसमेत हुनुहुन्छ । उहाँका राजनीतिक र साहित्यकसम्बन्धी दर्जनौं कृति प्रकाशित छन् ।
सिंह नेपाली राजनीतिमा निष्ठा, त्याग र इमानको प्रतिकका रुपमा रहनुभएको छ ।
८९ वर्षमा पनि सिंह एउटा युवा जत्तिकै जोश र जाँगरका राजनीति र साहित्य सिर्जनामा क्रियाशील हुनुहुन्छ ।
८९औँ जन्म दिनको शुभकामना दिँदै सामाजिक सञ्जाल फेसबुकमा स्ट्याटस लेख्दै सिंहकी पत्नी एवम् राष्ट्रिय जनमोर्चाकी नेतृ दुर्गा पौडेलले ‘एउटा निष्ठावान व्यक्तिको जीवन पारिवारिक रुपले, राजनैतिक रुपले, सामाजिक रुपले सबै हिसाबले निष्ठावान र इमानदार नै हुँदोरहेछ’ भन्दै ‘यी सबै रुपमा मोहनजी सधैँ त्याग र समर्पणको रुपमा अनवरत कृयाशील रहनुभयो । मैले जीवन साथीको रुपमा र परिवारले अभिभावकको रुपमा पनि उहाँको साथ र सहयोगको अभाव कहिले महसुस गर्नुपरेन । उहाँको उमेर एउटा पक्ष होला तर उहाँले देश, पार्टी, क्रान्ति र परिवारको लागि एउटा युवाले भन्दा कम योगदान गर्नुभएको छैन ।’
८९ वर्ष प्रवेशका अवसरमा नेता सिंहलाई हाम्रो पनि शुभकामना !
