विराटनगर । मोरङमा नक्कली परीक्षार्थीले एसईई दिएको भेटिएपछि परीक्षा रद्द गरिएको छ । उनीहरुलाई परीक्षा दिएका अवस्थामा विभिन्न विद्यालय परीक्षा केन्द्रबाट जिल्ला शिक्षा समन्वय इकाईको अनुगमन टोली पक्राउ गरेको हो ।
एसइई परीक्षामा फर्जी परीक्षार्थी भेटिएपछि उनीहरु संलग्न यसअघिका सबै विषयको परीक्षा रद्द गरिएको जिल्ला शिक्षा समन्वय एकाइले जानकारी दिएको छ । मोरङका विभिन्न तीन केन्द्रमा १ सय ९९ नक्कली परीक्षार्थी परीक्षा दिइसकेको अवस्थामा आज पक्राउ परेका थिए।
बिहीबारसम्म नेपाली, अंग्रेजी, गणित, विज्ञान र सामाजिक विषयको परीक्षा भएको छ । यी पाँचवटै परीक्षा रद्द भएका छन् ।
सार्वजनिक मावि केराबारी १२७, जनता मावि सुन्दरहरैंचाबाट २० जना र ग्रामथानको सरस्वती माध्यमिक विद्यालयबाट एक जना नक्कली विद्यार्थीलाई पक्राउ गरिएको हो ।
शिक्षा समन्वय र प्रहरीले विद्यार्थीसँग भएको प्रवेश पत्र र शिक्षा समन्वयबाट लगिएको सक्कली परिचय जुधाएर हेरेका थिए। फोटो फरक परेपछि प्रहरीले जन्म मिति, बुबा–आमाको नाम सोधेको थियो। नाम फरक परेपछि उनीहरुलाई नियन्त्रणमा लिइएको थियो । केही नक्कली परीक्षार्थी भने फरार भएका छन् ।
