प्युठान । नेकपा (मसाल) का महामन्त्री मोहनविक्रम सिंह प्युठानमा सम्मानित हुनुभएको छ । बालशिक्षा मावि मच्छि पूर्वविद्यार्थी समाजले विद्यालयका संस्थापक सिंहलाई एक कार्यक्रममा सम्मान गरेको हो ।

पूर्वविद्यार्थी समाजका अध्यक्ष जीवराज भट्टराई, महासचिव कृष्ण जिसी र सल्लाहकार ठाकुरप्रसाद ज्ञवालीले सिंहलाई सम्मान पत्रसहित दोसल्ला ओढाएर सम्मानित गर्नुभएको थियो ।

विद्यालय संस्थापकका रुपमा गर्नुभएको भूमिकाको कदर गर्दै सम्मानित गरिएको समाजले जनाएको छ ।

‘आजभन्दा लगभग ६ दशक अगाडिको परिवेशमा एउटा दुर्गम जिल्लामा माध्यमिक विद्यालय स्थापना र सञ्चालन कार्य चुनौतिपूर्ण थियो भन्ने कुराको जीवित साक्षीको रुपमा रहनुभएका तपाइँसँग साक्षत्कार भएको यस अवसरमा शिक्षा नै समाज विकासको प्रथम आधार हो भन्ने यथार्थतालाई आत्मसात गरेर विद्यालय स्थापनामा आफूलाई समर्पित गर्नुहुने संस्थापकप्रति नतमस्तक हुँदै र यहाँको दीर्घायु, सुस्वास्थ्य र सुख सम्वृद्धिको कामना गर्दै यो सम्मानपत्र प्रदान गर्दछौँ’ सम्मानपत्रमा भनिएको छ ।