काठमाडौं । नेकपा (मसाल) ले अहिले केही वामपन्थी शक्तिहरुले गरिरहेको एकताको प्रयासलाई ‘सिद्धान्तहीन’ बताएको छ ।
हालै सम्पन्न नेकपा (मसाल) को केन्द्रीय समिति बैठकबाट पारित राजनीतिक प्रतिवेदनमा आफ्नो पार्टीबाट फुटेर गएकाहरुले कतै न कतै टाँसिने प्रयास गरिरहेको निष्कर्ष निकालेको छ ।
मसालले ‘पार्टीबाट फुटेर गएपछि कतै न कतै कुनै आश्रय खोज्नु उनीहरूको बाध्यता हो’ भनेको छ । त्यसका लागि संघीयता त्याग्नुपर्ने, ‘मशाल’ नाम त्याग्नुपर्ने र तथा सिद्धान्तहीन प्रकारले विलय हुनुपर्ने बाध्यता रहेको मसालले स्पष्ट पारेको छ ।
साथै पार्टीबाट अहिले फुटेर जाने तत्वहरू अत्यन्त सिद्धान्तहीन, अवसरवादी र थोरै पनि कम्युनिस्ट नैतिकता नभएका तत्वहरू हुन् भनेको छ ।
राजनीतिक प्रतिवेदनको बुँदा नं ९ मा भनिएको छ,
‘कतिपय वामपन्थी शक्तिहरूले आपसमा पार्टी एकीकरणका लागि प्रयत्न गर्न थालेका छन् । तर त्यो सिद्धान्तहीन प्रकारको एकता नै हुने छ । किनभने उनीहरू मध्ये कतिपय पक्षले नेपालको अहिलेको क्रान्तिको चरण नयाँ जनवादी क्रान्तिको भएको ठान्दछन् भने कतिपय पक्षहरूले समाजवादी क्रान्तिको ठान्दछन् । नेपालको अहिलेको क्रान्तिको चरण नयाँ जनवादी क्रान्तिको वा समाजवादी क्रान्तिको ? त्यो आधारभूत रूपले नै बेग्लाबेग्लै सैद्धान्तिक विश्लेषणद्वारा टुङ्गिने कुरा हो । ती दुवैलाई एकै ठाउँमा मिलाएर पार्टी एकताको कुरा गर्नु गम्भीर प्रकारको सिद्धान्तहीन र अवसरवादी कार्य नै हो । यो कुरा हामीले हेर्न बाँकी नै छ । उनीहरूले त्यस प्रकारको सिद्धान्तहीन र अवसरवादी एकतालाई कसरी व्यवहारिक रूप दिन्छन् ? त्यो कुरा जे भएपनि उनीहरूको पार्टी एकताको आधार प्रतिगमन दिशाउन्मुख राजनीति नै हुनेछ । किनभने उनीहरूले नयाँ जनवादी वा समाजवादी ‘क्रान्तिकारी’ताको कुरा गरेर विद्यमान गणतन्त्रको विरोध गर्दछन् । त्यो ‘वामपन्थी’ संकीर्णवादी सोचाइ हो ।
त्यस प्रकारको एकताको सन्दर्भमा हाम्रो पार्टीबाट फुटेर गएका फुटपरस्त तत्वहरूको एकता पनि अत्यन्त तल्लो स्तरको सिद्धान्तहीन र अवसरवादी प्रयास नै हुने छ । हाम्रो पार्टीबाट फुटेर गएपछि कतै न कतै कुनै आश्रय खोज्नु उनीहरूको बाध्यता हो । प्रथमता, त्यो एकता हुन्छ भने उनीहरूले सङ्घीयताको विरोधको नीतिलाई त्याग्नुपर्ने छ, जस्तो कि हाम्रो पार्टीमा छँदासम्म सङ्घीयताको घोर विरोध गर्ने कतिपय तत्वहरूले अन्य पक्षहरूमा विलय भएपछि पहिले पनि सङ्घीयताको अवधारणालाई त्याग्ने गरेका छन् ।
द्वितीय, मसाल नामसित पार्टीको गौरवपूर्ण इतिहास जोडिएको हुनाले पार्टीबाट पहिले फुटेर जाने सबै पक्षहरूले आफ्नो समूहको नामसित ‘मसाल’ जोड्ने गरेका थिए । हाम्रो पार्टीबाट अलग भएका अहिलेका फुटपरस्त तत्वहरूले पनि अन्य पक्षहरूमा विलय हुँदा ‘मशाल’लाई पनि त्याग्ने छन् ।
तृतीय, यो कुरा स्पष्ट छ कि पार्टीबाट अहिले फुटेर जाने तत्वहरू अत्यन्त सिद्धान्तहीन, अवसरवादी र थोरै पनि कम्युनिस्ट नैतिकता नभएका तत्वहरू हुन् । पार्टीबाट पहिले फुटेर गएका सबै पक्षहरूले आफू एउटै पार्टीमा हुँदासम्मको पार्टीको गोपनीयता भङ्ग गर्ने जस्तो कुनै कार्य गरेका थिएनन् । पछिल्लोपल्ट हाम्रो पार्टीबाट फुटेर जाने तत्वहरूले पार्टीको गोपनीयताबारे नाङ्गो रूपले दुश्मनहरूका अगाडि पनि सार्वजनिक गर्ने काम गरेका छन् । त्यस प्रकारका अविश्सनीय तत्वहरूलाई नयाँ बन्ने ‘पार्टी’मा कुन प्रकारको ‘सम्मान’ प्राप्त हुने छ । त्यो कुरा आउने दिनहरूमा नै थाहा हुँदै जाने छ ।’
स्मरणीय छ, नेकपा (मसाल) बाट फुटेर गएको समूह हाल मोहन वैद्य नेतृत्वको नेकपा (क्रान्तिकारी माओवादी) सहित केही पार्टीहरुसँग मिल्ने प्रयास गरिरहेको छ । जसले जातीयतासहितको संघीयता स्वीकार गर्दछन् भने जनआन्दोलनका उपलब्धिहरुलाई गौण ठान्ने गर्दछन् ।
