काठमाडौँ । बौद्ध पुरातात्त्विक सहर निर्माणसम्बन्धी विचारगोष्ठी आगामी २०८० साल असार २९ र ३० गते काठमाडौँमा हुने भएको छ । यसअघि सो गोष्ठी वैशाख ३० गते गर्ने ठेगान गरिएको थियो ।
पुरातात्त्विक सहर निर्माण परियोजनासम्बन्धी विचारगोष्ठी आयोजक समिति कार्यदलको यही २०७९ चैत ९ गते बसेको बैठकले सो निर्णय गरेको हो ।
कार्यदलका सदस्य सचिव घनश्याम न्यौपानेद्वारा जारी प्रेसविज्ञप्तिमा कार्यक्रममा चारओटा कार्यपत्र प्रस्तुत गरिने, त्यसपूर्व कपिलवस्तु, रुपन्देही तथा पश्चिम नवलपरासीका बौद्ध पुरातात्त्विक स्थानको स्थलगत भ्रमण गरिने तथा सो समितिमा रामप्रकाश पुरी, शिव पौडेल, लोकराज भुाल र तारा थापालाई चयन गरिएको जानकारी दिइएको छ ।
यस्तो छ, प्रेसविज्ञप्तिको पूर्ण पाठ :
“आज मिति २०७९ चैत ९ गते बौद्ध पुरातात्त्विक सहर निर्माण परियोजनासम्बन्धी विचारगोष्ठी आयोजक समिति कार्यदलको बैठक हिमलाल पुरीको अध्यक्षतामा काठमाडौँमा सम्पन्न भयो । बैठकले गरेका निर्णयहरू सार्वजनिक गर्नका लागि यो प्रेसवक्तव्य जारी गरिएको छ ।
१. बौद्ध पुरातात्त्विक सहर निर्माणको परियोजनासम्बन्धी विचारगोष्ठी २०८० वैशाख ३० गर्ने ठेगान भएकोमा उक्त मिति परिवर्तन गरी २०८० असार २९ र ३० गते काठमाडौँमा गर्ने निर्णय गरिएको छ ।
२. विचारगोष्ठीमा चारओटा कार्यपत्र पेस गरिने निर्णय गरिएको छ ।
३. विचारगोष्ठी पूर्व कपिलवस्तु, रुपन्देही तथा पश्चिम नवलपरासीमा रहेका बौद्ध पुरातात्त्विक स्थानको स्थलगत भ्रमण गर्ने ठेगान गरिएको छ ।
४. विचारगोेष्ठी आयोजक समितिको कार्यदलमा रामप्रकाश पुरी, शिव पौडेल, लोकराज भुसाल र तारा थापालाई थप गरिएको छ । दुर्गा पौडेल, मनोज भट्ट र घनश्याम न्यौपाने रहेको तीन सदस्यीय सचिवालय गठन गरिएको छ ।
उक्त विचारगोष्ठीलाई सफल पार्नका हामीले सबैमा हार्दिक अपिल गर्दछौँ ।”
