काठमाडौं । राष्ट्रिय जनमोर्चाले विश्वकप छनौटमा पुग्न सफल नेपाली राष्ट्रिय क्रिकेट टोलीलाई बधाई दिएको छ ।
उपाध्यक्ष एवम् प्रवक्ता दुर्गा पौडेलले शुक्रबार एक विज्ञप्ति प्रकाशित गरी राष्ट्रिय टोलीलाई बधाई दिनुभएको हो ।
विज्ञप्तिमा पौडेलले खेलकुद क्षेत्रलाई प्राथमिकताका साथ बजेट विनियोन गर्न खेलाडीलाई प्रोत्साह दिने गरी योजना अघि बढाउन माग गर्नुभएको छ ।
विज्ञप्तिमा भनिएको छ, ‘आईसिसी विश्वकप लिग–२ अन्तर्गत प्रतिस्पर्धामा विजयी हुँदै नेपाली राष्ट्रिय क्रिकेट टोली विश्वकप छनौटमा प्रवेश गरेकोप्रति हाम्रो पार्टीले क्रिकेट टोलीका सदस्यहरु एवम् सम्बद्ध सबै पक्षलाई हार्दिक बधाई दिन्छ । साथै, सरकारसँग खेलाडीहरुको मनोबल बढाउने गरी योजना बनाउन तथा खेल क्षेत्रका पूर्वाधार निर्माणमा प्राथमिकता दिनसमेत माग गर्दछौँ ।’
आईसिसी विश्वकप लिग–२ को बिहीबार सम्पन्न अन्तिम खेलमा संयुक्त अरब एमिरेट्स (युएई) लाई डकवर्थ लेविस पद्धतिको आधारमा पराजित गर्दै नेपालले सिधै विश्वकप छनोटमा स्थानमा बनाएको हो ।
विश्वकप छनोट आगामी जुन र जुलाईमा जिम्बाबेमा हुनेछ ।
