काठमाडौं । अखिल नेपाल किसान महासंघको महासचिवमा तुल्सीराम सापकोटा चयन हुनुभएको छ । महासंघको हालै सम्पन्न विस्तारित बैठकले सापकोटालाई महासचिव चयन गरेको हो ।
बिहीबार वुटवलमा सम्पन्न विस्तारित बैठकले महासचिव कृष्ण केसीलाई विदाई गर्दै सापकोटालाई महासचिव बनाउने निर्णय गरेको अध्यक्ष भैरवराज रेग्मीले जानकारी दिनुभयो ।
बैठकले अगामी चैत्र महिना भरि २० जिल्लाहरुमा संगठनात्मक अभियान अभियान सञ्चालन गर्ने निर्णय गरेको छ । अभियानलाई सफल बनाउन विभिन्न जिल्लामा जिम्मेवारी पनि बाँडफाँट गरेको महासंघले जनाएको छ ।
जस अनुसार बागलुङमा धर्म कुवँर, प्युठान तुल्सी सापकोटा, अर्घाखाँची शेर बहादुर विसी, दाङ प्रेम नारायण आचार्य, डोटी उमाकान्त चौधरी, डडेलधुरा फागुसिंह महतरा, कैलाली कृष्ण विक, कञ्चनपुर हरिकृष्ण पाण्डे, वर्दिया जगदिश ढकाल, बाँके कृष्ण राज पाण्डे, कपिलवस्तु शिव पौडेल, स्याङ्जा राजेन्द्र गैरे, रुपन्देही रुकबहादुर पराजुली, चितवन डम्बर पुरी, रोल्पा हस्तमणी पुन, सुर्खेत प्रेम ठाडा, नवलपरासी तिलक सुवेदी, नवलपुर राम प्रसाद सापकोटा, बारा धर्मानन्द सुवेदी र रौतहट चिन्तामणी पौडेललाई इन्चार्ज तोकिएको छ ।
संगठनात्मक अभियान सञ्चालन गर्न ३ जनाको केन्द्रीय परिचालन समिति समेत बनाईएको छ । जसको संयोजकमा भैरवराज रेग्मी तथा सदस्यमा तुल्सीराम सापकोटा र शिव पौडेल रहनु भएको छ ।
बैठकले महासंघसहित अन्य किसान संगठनहरु अखिल नेपाल किसान महासंघ (क्रान्तिकारी), अखिल नेपाल किसान युनियन, अखिल नेपाल प्रगतिशील किसान संघद्वारा आयोजित संयुक्त किसान आन्दोलनलाई अगाडि बढाउने निर्णय पनि गरेको छ ।
यसैगरी लिपुलेक, कालापानी, लिम्पयाधुरामाथि भारतीय साम्राज्यवादद्वारा गरिएको अतिक्रमण विरुद्वको आन्दोलन, युवक संघले सञ्चालन गरेको भ्रष्टाचार विरुद्वको संघर्ष तथा अखिल (छैठौं) को संघीयता खारेजीको आन्दोलनलाई सहयोग गर्ने निर्णयसमेत गरेको अध्यक्ष रेग्मीले जानकारी दिनुभयो ।
