विराटनगर । मोरङको बेलबारी नगरपालिका–१ स्थित जनता माध्यमिक विद्यालयले हरिकान्त पौडेल र नानिमैया बस्नेतलाई सम्मान गरेको छ ।
२०७९ माघ २० गते शुक्रबार विद्यालयको पचपन्नौँ वार्षिकोत्सव तथा अभिभावक दिवसको अवसरमा उहाँहरूलाई सम्मान गरिएको हो ।
युगदर्शन मिडियाका व्यवस्थापकसमेत रहनुभएका हरिकान्त पौडेल र राष्ट्रिय जनमोर्चा प्रदेश नं. १ की सदस्य रहनुभएकी नानिमैया बस्नेतले आफ्ना ससुरा/बुबाको निधन भएपछि विद्यालयलाई आर्थिक सहयोग गर्नुभएको थियो । शिक्षाक्षेत्रको प्रवद्र्धनका लागि गरिएको यस्तो सहयोगबापत् उहाँहरूलाई सम्मान गरिएको विद्यालयले जनाएको छ ।
कार्यक्रममा प्रमुख अतिथि प्रदेश नं. १ का सामाजिक विकास मन्त्री बुद्धिबहादुर राजभण्डारी हुनुहुन्थ्यो ।
सो अवसरमा पूर्व सांसद गुरुप्रसाद बराल, प्रदेश सांसद ज्ञानेन्द्र सुवेदी र मानबहादुर लिम्बु, सहायक प्रमुख जिल्ला अधिकारी प्रदीपकुमार शाह, शिक्षा विकास तथा समन्वय एकाइ मोरङका प्रमुख टङ्कप्रसाद गौतम, बेलबारी नगरपालिका उपप्रमुख नितु थापा, सोही नगरपालिकाका प्रमुख प्रशासकीय अधिकृत गणेशराज कार्की, बेलबारी नगरपालिका वडा नं. १ का मणि पुलामी मगर, बेलबारी नगरपलिका शिक्षा, युवा तथा खेलकुद शाखा प्रमुख भूपेन्द्र कोइरालालगायतको आतिथ्य रहेको थियो ।
कार्यक्रममा जग्गादाता, अक्षयकोषका सहयोगकर्ता, चन्दादाता, अभिभावक र पूर्व विद्यार्थीलाई पनि सम्मान गरिएको थियो ।
विद्यालय व्यवस्थापन समितिका अध्यक्ष शिवप्रसाद बरालको अध्यक्षता तथा टेकराज एक्चाई मगरको सञ्चालनमा अघि बढेको उक्त कार्यक्रममा उपस्थिति सम्पूर्णलाई गोमा कार्कीले स्वागत गर्नुभएको थियो ।
