धनुषा । राष्ट्रिय जनमोर्चा प्रदेश २ समितिले माघ २४ गते जनकपुरमा नौ दलले आयोजना गर्ने विरोध सभामा जनसहभागिताका लागि तयारी गरिरहेको छ । सोमबार धनुषाको ढल्केबरमा बसेको प्रदेश समितिको बैठकले विरोधसभा सफल पार्न विभिन्न निर्णय गरेको राजमो केन्द्रीय सदस्य एवं प्रदेश २ का इन्चार्ज चिन्तामणी पौडेलले जानकारी दिनुभयो ।
यही माघ २४ गते प्रदेश नं २ को जनकपुरलगायत सातवटै प्रदेशमा नेकपा (मसाल) र क्रान्तिकारी माओवादी लगायतका नौ दलले एमसीसी र सीमा अतिक्रमण विरुद्ध विरोध सभा गर्दैछन् । कार्यक्रमलाई सफल पार्न राजमोले आवश्यक तयारी गरिरहेको नेता पौडेलले युगदर्शनलाई बताउनुभयो ।
यो पढ्नुहोस्ः एमसीसी र सीमा अतिक्रमण विरुद्ध संयुक्त संघर्ष गर्ने नौ दलको घोषणा
यस्तै, प्रदेश २ का विभिन्न जिल्लाहरुमा फागुन महिनाभर सांगठनिक अभियान सञ्चालन गर्ने गरी योजना पनि बनाइएको छ । बुधबार सर्लाहीको लालबन्दीमा बसेको राजमो प्रदेश समितिको बैठकले ति प्रदेश अन्तर्गतका जिल्लाहरुमा भेलाको आयोजना गर्ने निर्णयसहित जिम्मेवारी बाँडफाँड गरेको छ ।
राजमो नेता पौडेलका अनुसार माघ २५ गते बारा जिल्लाको भेला हुनेछ जसको जिम्मा राजमो केन्द्रीय सचिव हिमलाल पुरीलाई दिइएको छ । यस्तै, माघ २६ गते पर्सा र सर्लाहीमा भेला हुनेछ । पर्सामा हरि सापकोटा र सर्लाहीमा नवराज पौडेललाई जिम्मा तोकिएको छ । यसैगरी, माघ २७ गते गते रौतहट जिल्ला भेला हुनेछ जसको जिम्मेवारी धर्मानन्द सुवेदीलाई दिइएको छ ।
माघ २८ गते सिराहामा हुने भेलाको जिम्मा काजिलाल वाइबााले पाउनुभएको छ भने सप्तरी, महोत्तरी र धनुषाको भेला माघ २९ गते हुनेछ । जसमा सप्तरी–चिन्तामणी पौडेल, धनुषा–अक्षलाल शाह र महोत्तरी–कर्ण थापाले जिम्मेवारी पाउनुभएको छ ।
