बुटवल । रक्तिम सांस्कृतिक अभियानका वरिष्ठ कलाकार कमला केसीप्रति श्रद्धाञ्जली अर्पण गरिएको छ । आइतबार बुटल चाँदमारीमा शोक सभाको आयोजना गरी केसीप्रति श्रद्धासुमन अर्पण गरिएको हो ।
कार्यक्रममा राष्ट्रिय सभा सदस्य राजेश विश्वकर्मा, रक्तिम सांस्कृतिक अभियानका केन्द्रीय अध्यक्ष गिरीप्रसाद बुढा, कमला केसीका सहकर्मी कलाकारहरू तेजेन्द्र थापा र मिना बुढाथोकीले श्रद्धाञ्जली मन्तब्य राख्नु भएको थियो ।
रक्तिम सांस्कृतिक अभियान जिल्ला समिति रूपन्देहीको आयोजनामा भएको श्रद्धाञ्जली सभाको अध्यक्षता जिल्ला अध्यक्ष सिता बस्याल र सञ्चालन उपाध्यक्ष दिलिप रसाइलीले गर्नु भएको थियो ।
मृतक कमला केसीको सम्झनामा १ मिनेट मौनधारण पश्चात् उहाँको तस्बिरमा माल्यार्पण गरिएको थियो ।
कार्यक्रममा रक्तिमका महासचिव जीवन शाही, कम्युनिष्ट संग्राहलयका अध्यक्ष चेतनाथ आचार्य, बुद्धिजीवी दुर्गा खरेल, अखिल नेपाल उद्योग व्यापार संघका अध्यक्ष ढुन्डीराज पौडेल, प्रगतिशील पत्रकार संघका सल्लाहकार सुमन अधिकारी, मृतक कमला केसीका पति केदार श्रेष्ठ, उहाँका छोरा, छोरी आफन्तजन लगायत सहभाग सबैले उहाँको तस्बिरमा श्रद्धा सुमन अर्पण गर्नु भएको थियो ।
रक्तिम सांस्कृतिक अभियानका पूर्वकेन्द्रीय सदस्य केसीको गत असोज २९ गते निधन भएको थियो । उहाँ दुई वर्षदेखि क्यान्सरसँग जुधिरहनुभएको थियो ।
२०३४ सालमा बुटवल चाँदमारीमा जन्मेकी केसी १०र१२ वर्षको उमेरदेखि नै कला क्षेत्रमा लाग्नुभएको थियो । उहाँ २०५४ सालमा रक्तिम सांस्कृतिक अभियानको केन्द्रीय सदस्य बन्नुभएको थियो ।
केसी नेकपा (मसाल) को पार्टी सदस्यसमेत रहेको र उहाँ पार्टी कमिटीमा ‘क रचना’ नामले क्रियाशील रहने गरेको नेकपा (मसाल) सम्बद्ध स्रोतले जनाएको छ ।
पछिल्लो समय उहाँले रक्तिमका कलाकारलाई नृत्यसम्बन्धी प्रशिक्षण दिने गर्नुहुन्थ्यो ।
रक्तिमका वरिष्ठ कलाकार कमला केसीप्रति पार्टीको झण्डा ओढाएर सम्मान
पूर्व केन्द्रीय सदस्य कमला केसीको निधनप्रति रक्तिमको श्रद्धाञ्जली
