वासिङ्टन, २१ कात्तिक । अमेरिकी राष्ट्रपति डोनाल्ड ट्रम्पले शुक्रबार आफ्नो कडा आप्रवासन नीतिका प्रमुख योजनाकार स्टिफन मिलरलाई नयाँ चिफ अफ स्टाफ (प्रमुख कर्मचारी) नियुक्त गर्नुभएको छ । मध्यावधि निर्वाचनमा रिपब्लिकन पार्टीले ठूलो हार बेहोरेपछि मिलरको नियुक्तिलाई ट्रम्प प्रशासन थप आक्रामक रूपमा प्रस्तुत हुने सङ्केतका रूपमा हेरिएको छ ।

एकचालिस वर्षीय मिलरले सुसी वाइल्सको स्थान लिनुहुनेछ । यस साताको सुरुमा डेमोक्रेटिक पार्टीको उल्लेखनीय जितपछि ह्वाइट हाउसबाट बाहिरिने वाइल्स पहिलो उच्चपदस्थ अधिकारी बन्नुभएको छ । ह्वाइट हाउसका एक अधिकारीका अनुसार उहाँले बिहीबार राति नै राजीनामा दिनुभएको थियो ।

मिलर ट्रम्पका निकट र विश्वासिला सहयोगी हुनुहुन्छ । उहाँले ट्रम्पको ‘अमेरिका फस्र्ट’ नीतिअनुरूप कडा आप्रवासन नीतिको वकालत गर्दै आउनुभएको छ । नीतिसम्बन्धी उपप्रमुख र आन्तरिक सुरक्षा सल्लाहकारका रूपमा उहाँ राष्ट्रपतिको दोस्रो कार्यकालमा अघि बढाइएको बृहत् देशनिकाला कार्यक्रमका प्रमुख योजनाकार हुनुहुन्थ्यो ।

आप्रवासन अधिकारीहरूले गत जनवरीमा मिनियापोलिसमा दुई प्रदर्शनकारीको गोली हानी हत्या गरेपछि मिलरको व्यापक आलोचना भएको थियो । उहाँले ती अधिकारीहरूको बचाउ गर्नुभएको थियो । उक्त घटनापछि अमेरिकाका विभिन्न स्थानमा विरोध प्रदर्शन भएका थिए ।

डेमोक्रेटिक पार्टीका अल्पमत नेता चक शुमरले मिलरको नियुक्तिको आलोचना गर्दै उहाँ प्रशासनका कठोर नीतिका प्रमुख योजनाकार भएको टिप्पणी गर्नुभएको छ । उहाँले डेमोक्रेटिक पार्टीले मिलरका कदमको हरेक तहमा विरोध गर्ने बताउनुभएको छ ।

मिलरको नियुक्तिबारे पत्रकारले सोधेको प्रश्नमा ट्रम्पले परिवर्तन आवश्यक भएकाले यस्तो निर्णय गरेको बताउनुभयो । उहाँले मिलरलाई उत्कृष्ट योद्धा र सुरुदेखिकै विश्वासिलो सहयोगीका रूपमा प्रशंसा गर्नुभयो ।

यसअघि ट्रम्पले वाइल्सले उत्कृष्ट काम गरेको भन्दै उहाँ अब आफ्नो राजनीतिक अभियानमा संलग्न हुने बताउनुभएको थियो । वाइल्स ह्वाइट हाउसको चिफ अफ स्टाफ बन्ने पहिलो महिला हुनुहुन्थ्यो । उहाँले ट्रम्पको पहिलो कार्यकालमा देखिएको कर्मचारीबीचको कलह र अव्यवस्थालाई दोस्रो कार्यकालमा नियन्त्रण गर्न महत्वपूर्ण भूमिका निर्वाह गर्नुभएको थियो ।

वाइल्सले सामाजिक सञ्जाल एक्समा ह्वाइट हाउसमा ट्रम्पको सेवा गर्न पाउनु आफ्नो जीवनकै ठूलो सम्मान भएको बताउँदै शुक्रबार आफ्नो अन्तिम कार्यदिन रहेको जानकारी दिनुभएको थियो ।

यसैबीच, ट्रम्पले सीबीएस न्युजको कार्यक्रम ‘६० मिनेट’ का लागि दिनुभएको अन्तर्वार्तामा प्रशासनमा थप केही कर्मचारी परिवर्तन गर्न सक्ने सङ्केत गर्नुभएको छ ।