बागलुङ । राष्ट्रिय जनमोर्चाका अध्यक्ष चित्रबहादुर केसीले लोकतन्त्र जोगाउन बेग्लाबेग्लै नीति र चरित्र बोकेका दलबीच गठबन्धन गर्नुपरेको बताउनुभएको छ ।
शनिबार बागलुङको कुश्मिसेरामा आयोजित संयुक्त कार्यकर्ता भेलालाई सम्बोधन गर्दै बागलुङ क्षेत्र नं १ बाट प्रतिनिधिसभा सदस्यका उम्मेदवार चित्रबहादुर केसीले सो कुरा बताउनुभएको हो ।
उहाँले कतिपय मानिसहरुले बुझेर वा नबुझेर राष्ट्रिय जनमोर्चाले सिद्धान्त छोडेर अपवित्र गठबन्धन गरेको आरोप लगाउने गरेको भन्दै लोकतन्त्र जोगाउन गठबन्धन गर्नुपरेको स्पष्ट पार्नुभयो ।
‘हामीले के बुझ्नुपर्छ भने यो लोकतन्त्र स्थापना गर्न नेपाली जनताले ७५/८० वर्षदेखि संघर्ष गर्दै आएका छौँ । अब यो लोकतन्त्र प्राप्त भएपछि नेपाली जनताका समस्या समाधान भए भनेर म गफ लगाउँदिन । जनताका समस्या अहिले पनि उस्तै छन्’ केसीले भन्नुभयो, ‘तर, त्यो भएपनि लोकतन्त्र जोगाउनका लागि बेग्लाबेग्लै सिद्धान्त, बेग्लाबेग्लै नीति र बेग्लाबेग्लै चरित्र भएका दलहरुबीच गठबन्धन भएको हो ।’
अध्यक्ष केसीले २०७४ सालमा वामगठबन्धन भएर करिब दुई तिहाई मत ल्याएपनि टिकाउन नसकेको बताउनुभयो । केपी ओलीको स्वेच्छाचारी प्रवृतिका कारण झण्डै दुई तिहाई बहुमतको सरकार तीन वर्ष नपुग्दै भताभुंग भएको केसीले आरोप लगाउनुभयो ।
उहाँले निर्वाचनमा जम्मा २३ सिटमा खुम्चिएको नेपाली कांग्रेस पाँच वर्ष चुप्प लागेर बस्ने मनस्थितीमा रहेपनि ओलीको प्रतिगामी कदमका कारण कांग्रेसलाई देशको नेतृत्वमा ल्याउनुपरेको पनि स्पष्ट पार्नुभयो । उहाँले २०७२ सालको संविधानले अल्पमतमा परेका आधारमा प्रधानमन्त्रीले संसद विघटन गर्ने अधिकार नदिएको स्पष्ट पार्दै ओलीले आफू अल्पमतमा परेपछि संविधानको उल्लंघन गर्दै संसद विघटन गरेको र अदालतको आदेशका बावजुद दोस्रोपटक संसद विघटन गरेर प्रतिगमनतर्फ देशलाई लगेको जिकीर गर्नुभयो ।
उहाँले ओलीको प्रतिगामी कदमलाई विभिन्न देशी विदेशी शक्तिहरुको साथ रहेको भन्दै अहिले त्यसलाई रोक्न नसके फेरि लामो समयसम्म लोकतन्त्र र गणतन्त्रका लागि लड्नुपर्ने अवस्था आउने बताउनुभयो ।
अध्यक्ष केसीले आफू बागलुङे जनताका लागि नयाँ उम्मेदवार नरहेको चर्चा गर्दै बागलुङका जनताले आफूलाई पटक पटक संसदमा पठाएको र आफूले पनि जनताका जनजीविकाका सवाल, राष्ट्रियता र लोकतन्त्रका लागि सक्दो योगदान दिएको पनि स्पष्ट पार्नुभयो ।
प्युठानी जनताको शिर कहिल्यै झुक्न दिने छैन : दुर्गा पौडेल
