काठमाडौँ । सन् १८१४ मा देहरादुनस्थित नालापानी गढीमा भएको नेपाल–अङ्ग्रेज युद्धमा नेपाली फौजको तर्फबाट कप्तानी गर्नुभएका वीर बलभद्र कुँवरको लडाइँमा आधारित रहेर निर्माण गरिएको “नालापानी” लाई करछुट गराउन पहल सुरु भएको छ ।
चलचित्र विकास बोर्डका अध्यक्ष भुवन केसीले सञ्चार तथा सूचना प्रविधि मन्त्रालयका सचिव डा. बैकुण्ठ अर्यालसँग भेट गर्दै करछुट प्रदान गर्ने व्यवस्था मिलाउन अनुरोध गर्नुभएको हो ।
‘हाम्रो आग्रहमा सचिवज्यूले अर्थ मन्त्रालयमा करछुटको अनुरोधसहित पत्राचार गर्नुभएको छ । बोर्डले विशेष चलचित्र घोषणा गरी सम्मान गरिसकेकोले यो करछुटयोग्य छ’ बोर्डका अध्यक्ष केसीले भन्नुभयो । उहाँले हलमा देखाइने विज्ञापनलगायतका अन्य विषयमा सहजीकरणका लागि पहल गर्नुभएको छ ।
फिल्मका निर्माता तथा निर्देशक रिमेश अधिकारीले बोर्डले गरेको पहलले ऊर्जा मिलेको बताउनुभयो ।
‘यो फिल्म मात्र नभई नेपाली वीरताको इतिहास हो । यस्ता विषयवस्तुलाई फिल्म बनाउँदा अन्य देशमा राज्यले सेवासुविधा दिने गरेका छन् । यहाँ पहल भएको छ । म जस्तै अन्य लगानी गर्न इच्छुक निर्मातालाई यसले अगाडि बढ्न सहयोग गर्छ’ उहाँले भन्नुभयो ।
सञ्चार मन्त्रालयमा सचिव, उपसचिव, सहसचिव र चलचित्र विकास बोर्डका अध्यक्षसहितको बैठकमा प्रवद्र्धन, स्थानीयसहितका विभिन्न कर छुटको सन्दर्भमा छलफल भएको निर्देशक अधिकारीले जानकारी दिनुभयो ।
