कर्णाली । ‘माथिल्लो कर्णाली बचाउ राष्ट्रिय अभियान’ले पूर्वअध्यक्ष भरत शाहीले भ्रम पार्न खोजेको भन्दै कुनै खालको भ्रममा नपर्न आग्रह गरेको छ ।
अभियानका महासचिव पूर्णबहादुर शाहीले बुधबार एक वक्तव्य प्रकासशित गरी भरत शाही सो अभियानमै नरहेको भन्दै भ्रममा नपर्न आग्रह गर्नुभएको छ ।
पूर्वअध्यक्ष भरत शाहीले अभियानमा नरहे पनि सामाजिक सञ्जालमार्फत अध्यक्ष भनेर भ्रम पार्न कोशिश गरिरहेको अभियानले जनाएको छ ।
हाल माथिल्लो कर्णाली बचाउ राष्ट्रिय अभियानको अध्यक्ष कमलविक्रम शाही र महासचिव पूर्णबहादुर शाही हुनुहुन्छ ।
तत्कालिन अध्यक्ष भरतबहादुर शाही राष्ट्रिय जनमोर्चा परित्याग गरी एमालेमा प्रवेश गरेपछि अभियानले उनलाई अध्यक्षबाट हटाएको थियो ।
माथिल्लो कर्णाली बचाउ राष्ट्रिय अभियान राष्ट्रिय जनमोर्चाको पहलमा बनेको हो भने राजमोकै नीति अन्तर्गत कर्णाली बचाउन विभिन्न कार्यक्रम पनि हुँदै आएका छन् ।
भरत शाहीले अर्कै पार्टी प्रवेश गरेर सो अभियानबाट अलग भएपनि फेसबुकमार्फत आफूलाई अध्यक्ष भन्दै अभियानकै बदनाम गर्ने प्रयास गरिरहेका छन् । महासचिव पूर्णबहादुर शाहीले भरतको सो कार्यप्रति आपत्ति जनाउँदै भ्रममा नपर्न आग्रह गर्नुभएको हो ।
अभियानले माथिल्लो कर्णाली जलविद्युत आयोजना स्वदेशी लगानीमा निर्माण गर्न लगातार दबाब दिँदै आएको छ । लगानी जुटाउन नसकेर १५ वर्षदेखि लाइसेन्स नै ‘होल्ड’ गरिरहेको भारतीय कम्पनी जीएमआरसँगको सम्झौता रद्ध गरेर नागरिक र सरकारको संयुक्त लगानीमा आयोजना सञ्चालनमा ल्याउनु पर्ने माग अभियानको छ ।
भरत शाही संलग्न रहेको पार्टी एमालेले भने सरकारमा छँदा जीएमआरसँगको सम्झौताको म्याद थप गर्दै कर्णाली नदी भारतलाई नै सुम्पने काम गरिरहेको छ ।
(समाचारमा यसअघि भुलबस गलत तस्बिर पर्न गएकोमा सच्याइएको छ–सम्पादक । )
