काठमाडौँ । सर्वोच्च अदालतको आज बसेको पूर्ण बैठक निस्कर्षहीन बनेको छ ।

सञ्चारमाध्यममा विचौलिया भनिएका इनम सापकोटासँग प्रधानन्यायाधीश शर्मा र न्यायाधीश हरिप्रसाद फुयाँलको नाम जोडिएको सन्दर्भमा छलफल गर्न उक्त बैठक बोलाइएको थियो ।

बैठकमा प्रधानन्यायाधीश डा. मनोजकुमार शर्मासहित सर्वोच्चका १६ मध्ये १४ न्यायाधीश उपस्थित थिए । वरिष्ठतम न्यायाधीश सपना मल्ल प्रधान र अब्दुल अजिज मुसलमान विदेशमा रहेकाले उपस्थित भएका थिएनन् ।

करिब एक घन्टासम्म भएको छलफलमा सहमति जुट्न नसकेको बताइएको छ । बैठकमा केही न्यायाधीशले यस विषयमा आन्तरिक रूपमा छानबिन समिति बनाउनुपर्ने धारणा राखे तर यसमा सहमति जुट्न सकेन ।

आज निस्कर्ष ननिस्किएपछि सोमबार फेरि बैठक बस्ने भनेर न्यायाधीशहरू उठेका छन् । सोमबारको बैठकमा न्यायाधीश सपना र अब्दुल पनि सहभागी हुने अपेक्षा छ ।