सियोल । उत्तर कोरियाले कृत्रिम बौद्धिकता (एआई) प्रविधिमा आधारित ड्रोन र पहिलोपटक छ सय मिलिमिटर क्षमताको स्नाइपर बहुप्रक्षेपक रकेट प्रणाली सार्वजनिक गरेको छ ।
सरकारी समाचार संस्था केसिएनएका अनुसार बिहीबार किम जोङ उनको उपस्थितिमा आयोजित सैन्य प्रदर्शनीमा आत्मघाती ड्रोन, क्रुज क्षेप्यास्त्र र बहुउद्देश्यीय मानवरहित विमान प्रस्तुत गरिएका थिए ।
ती हतियारले टापुका लक्ष्यमा शत्प्रतिशत सटिकताका साथ प्रहार गरेको उत्तर कोरियाको दाबी छ । प्रदर्शनीका क्रममा छ सय मिलिमिटरका रकेट तथा ड्रोनबाट दक्षिण कोरियाली सैनिक चौकी र अमेरिकी एम१ अब्राम्स ट्याङ्कका नमुना लक्ष्यमा आक्रमण गरिएको तस्बिर सार्वजनिक गरिएको छ ।
किमले आणविक हतियार सम्पन्न राष्ट्रका रूपमा उत्तर कोरियाले परम्परागत हतियारको आधुनिकीकरणसँगै कृत्रिम बौद्धिकता र ड्रोन प्रविधिको विकासलाई तीव्रता दिनुपर्ने बताए ।
यसैबिच, दक्षिण कोरियाली सेनाले उत्तर कोरियाको वोनसान क्षेत्रबाट पूर्वी सागरतर्फ प्रहार गरिएका करिब १० ओटा छोटो दुरीका ब्यालेस्टिक क्षेप्यास्त्र पत्ता लगाएको जनाएको छ । ती क्षेप्यास्त्र करिब २५० किलोमिटर टाढासम्म पुगेका थिए । यस वर्ष उत्तर कोरियाले गरेको यो सत्रौँ क्षेप्यास्त्र परीक्षण हो । (रासस/एएनआई)
