काठमाडौं । नेकपा (एमाले) का नेता भीम रावल र परराष्ट्रमन्त्री डा. नारायण खड्काबीच चर्काचर्की भएको छ ।
शुक्रबार सिंहदरबारमा बसेको प्रतिनिधिसभाको अन्तर्राष्ट्रिय सम्बन्ध समितिको बैठकमा एमाले नेता रावलले अमेरिकी उपविदेशमन्त्री उज्रा जियाले नेपालमा तिब्बती शरणार्थी भेटेको विषयमा आपत्ति जनाएपछि पररषट्रमन्त्री खड्कासँग विवाद भएको हो ।
अमेरिकी स्टेट पार्टनरसिप प्रोगाम (एसपीपी) बारे बोल्ने क्रममा रावलले अमेरिकी उपविदेशमन्त्री उज्रा जियाले गत जेठ ६ गतेदेखि भएको नेपाल भ्रमणका क्रममा तिब्बती शरणार्थीलाई भेटेकोबारे कडा आपत्ति जनाउनुभयो ।
‘अमेरिकी उपविदेशमन्त्री नेपाल भ्रमणका बेला जुन तिब्बती शरणार्थीको क्याम्पमा जानुभयो, त्यसलाई लिएर परराष्ट्र मन्त्रीले यो त नेपालको हितमा छ भन्नुभयो’ रावलले भन्नुभयो, ‘देशको परराष्ट्रमन्त्रीले यस्तो बोल्ने हो भने स्वतन्त्र परराष्ट्र नीतिको रक्षा कसरी हुनसक्छ ?’
रावलले यति पश्न गरेपछि खड्काले ‘त्यस्तो नबोलेको’ भन्दै बीचमै राक्न खोज्नुभएको थियो । लगत्तै रावलले आफूले रेकर्ड ल्याएर समितिमा देखाउन सक्ने चुनौती दिनुभयो ।
खड्काले ‘ल्याउनुस्, ल्याउनुस्’ भन्दै रावलसँग सवाल–जवाफ गरेपछि चर्काचर्की परेको हो।
परराष्ट्रमन्त्री खड्काले दिएको प्रतिक्रियाले नेपालको परराष्ट्र नीतिमा विचलन आएको कुरा प्रमाणित गरेको रावलको भनाई थियो ।
बैठकमा रावलले नेपाली सेनालाई अन्य सैन्य गठबन्धनसँग भिड्न लगाउने कुरा इन्डो प्यासिफिक सैन्य रणनीतिको दस्तावेजमा लेखिएको उल्लेख गर्दै यो विषय पनि आपत्तिजनक भएको बताउनुभयो ।
‘नेपाली सेनालाई अर्को अमुक देशसँग भिड्न सहभागी गराउने कुरा आईपीएसमा लेखिएको छ, जुन आपत्तिजनक छ,’ रावलले भन्नुभयो ।
अमेरिकाको हिन्द प्रशान्त रणनिति (आईपीएस) को अंग भनेर एसपीपीलाई सन् २०१९ जुनमा राखिएको उल्लेख गर्दै रावलले एसपीपीको विषय राष्ट्रको सुरक्षासँग जोडिएको ले त्यसलाई सरकारले लुकाउन नमिल्ने स्पष्ट पार्नुभयो ।
एसपीपीको विषयमा परराष्ट्रमन्त्री खड्का र प्रधानमन्त्री शेरबहादुर देउवा मौन हुनुको रहस्यमय भएको रावलको भनाई छ । उहाँले एसपीपीको अंग हुन सक्दैनौँ भनेर नेपालले पत्र लेख्नुपर्ने स्पष्ट पार्नुभयो ।
