काठमाडौं । प्युठानको झिमरुक गाउँपालिकामा पार्टीको निर्देशनविपरित नेकपा (एमाले) सँग तालमेल गरेका नेकपा (माओवादी केन्द्र)का नेता पितबहादुर एमसीलाई पार्टीले कारबाही गर्ने भएको छ ।
झिमरुकमा पाँच दलीय गठबन्धनको निर्णयविपरित एमसीले एमालेसँग अघोषित रुपमा चुनावी तालमेल गरका थिए । माओवादी) केन्द्रले गाउँपालिका अध्यक्षको उम्मेदवार रहेका एमसीलाई एमालेसँगको ‘अवैध र अघोषित’ बन्द नगरे कारबाही गर्ने भन्दै सचेत गराएको छ ।
माओवादी केन्द्र लुम्बिनीका इन्चार्ज चक्रपाणी खनाल र प्रदेश अध्यक्ष सुदर्शन बरालले एमसीलाई ‘एमालेसँग गरेको ‘अवैध र अघोषित’ गठबन्धन बन्द गर्न निर्देशनसहित पत्र पठाएका छन् ।
सो पत्रमा पार्टीको नीति विपरित प्रतिगमनकारी एमालेसँगको तालमेल गरेको भन्दै सो तालमेल भंग नगरे पार्टीले कारबाही गर्ने चेतावनी दिइएको छ।
सो पत्रमा भनिएको छ, ‘प्रतिगमनकारी दल नेकपा (एमाले) सँग अघोषित र अवैध गठबन्धन गरेको भन्ने जानकारीमा आएकोले उक्त कार्य बन्द गर्न हुन सचेत गराइन्छ । अन्यथा पार्टीको नीति अनुसार कारबाही गरिने ब्यहोरा जानकारी गराइन्छ ।’
झिमरुक गाउँपालिकामा पाँचदलीय गठबन्धनका राष्ट्रिय जनमोर्चा र नेपाली कांग्रेसबीच तालमेल भएको छ । गठबन्धनको तर्फबाट गाउँपालिका अध्यक्षमा जनमोर्चाका टीकाबहादुर जिसी र उपाध्यक्षमा कांग्रेसका प्रमोद पोखरेल उम्मेदवार छन् ।
यस्तै, माओवादी केन्द्रले एमसीलाई अध्यक्षमा उठाएको छ भने एमालेकी बिष्णु घर्ती उपाध्यक्षको उम्मेदवार छन् ।
माओवादी केन्द्रले कारबाही गर्ने भएपछि एमसीलाई अब भोट दिनुको अर्थ नरहेको गठबन्धनका स्थानीय नेता कार्यकर्ता बताउँछन् ।
‘गठबन्धन दल र पार्टीको निर्देशन विपरित गएकाले एमसीलाई माओवादीले कारबाही गर्न उठाएको कदम स्वागतयोग्य छ’ जनमोर्चाका एक नेताले भने, ‘अब माओवादी–एमालेलाई भोट दिनुको अर्थ छैन । राजमो र कांग्रेस गठबन्धनका उम्मेदवारलाई जनताले जिताउँछन् ।’
