काठमाडौं । अखिल नेपाल किसान महासंघका अध्यक्ष भैरवराज रेग्मी राष्ट्रिय भूमि आयोगको केन्द्रीय सदस्य नियुक्त हुनुभएको छ । रेग्मीलाई सरकारले मंगलबार (चैत १५ गते) आयोगको सदस्यमा नियुक्त गरेको हो ।
उहाँले हिजै पद तथा गोपनीयताको शपथ लिनुभएको छ । बुधबार आयोगको बैठक बसेर अहिलेसम्म भएका काम कारबाहीबारे जानकारी लिनुका साथै आगामी दिनमा कसरी अगाडि बढ्ने भन्नेबारे निर्णय हुने रेग्मीले जानकारी दिनुभयो ।
सरकारले गत भदौ ३० गते अध्यक्ष देवी ज्ञवाली नेतृत्वको सुकुम्बासी समस्या समाधान आयोग खारेज गर्दै राष्ट्रिय भूमि आयोग गठन गरेको थियो । आयोगको अध्यक्षमा केशव निरौला र उपाध्यक्षमा नहेन्द्र खड्का रहनुभएको छ ।
आयोगमा राष्ट्रिय जनमोर्चाको तर्फबाट रेग्मीले प्रतिनिधित्व गर्नुभएको छ भने कतिपय जिल्लामा राजमोकै नेताहरुले नेतृत्व गरेका छन् ।
यसअघि गत पुस ३० गते बागलुङमा राजमो नेता धर्म कुँवर र प्युठानमा इमानसिंह खड्कासहित २८ जिल्ला अध्यक्ष नियुक्त गरेको थियो ।
यस्तै, राजमोका तर्फबाट कतिपय जिल्लामा सदस्यहरु नियुक्त भएर काम अगाडि बढाएका छन् ।
