नयाँदिल्ली । मूल प्रवाह अखिल भारत नेपाली एकता समाज, नयाँदिल्ली नगर समितिद्वारा एक जना क्यान्सरपीडितलाई आर्थिक सहयोग गरिएको छ ।
पराजुलीलाई बचाउन नगर समितिको तर्फबाट आर्थिक सङ्कलन गरी भारु ५० हजार ३०० (नेरु ८० हजार ४८०) सहयोग गरिएको छ ।
नगर समितिका अध्यक्ष बिनबहादुर कुँवर, उपाध्यक्ष तिलक खनाल र नगर सदस्य आर.बी. रायमाझीले अस्पतालमा पुगी सो रकम हस्तान्तरण गर्नुभएको थियो । अस्पतालमा भर्ना भई नियमित उपचार चलेको हुँदा दुई चरणमा सहयोग हस्तान्तरण गरिएको थियो ।
जिल्ला अर्घाखाँची सन्धीखर्क नगरपालिका ८ खाँपडाडा बस्ने श्रीदेवीराम पराजुलीको ३१ वर्षीय छोरा नारायण पराजुलीले मूल प्रवाह अखिल भारत नेपाली एकता समाज नयाँ दिल्ली नगर समितिमा आफ्नो आर्थिक अवस्था कमजोर रहेको तर आफू क्यान्सरबाट ग्रसित रहेको भनी आर्थिक सहयोगका लागि निवेदन दिएका थिए । पीडित पराजुली नई दिल्लीको सादिक नगरमा डेरा गरी बस्नुभएको छ ।
उहाँले नयाँदिल्लीको अखिल भारत आयुर्विज्ञान संस्थान (एम्स) मा क्यान्सरको उपचार गराइरहनु भएको छ । क्यान्सरको उपचार अत्यन्त महङ्गो भएकाले उहाँकी श्रीमती शान्ता पराजुलीले मूल प्रवाह अखिल भारत नेपाली एकता समाज नई दिल्लीमा उपचाररत नारायण पराजुली बचाउन आर्थिक सहयोगको अपिल गर्नुभएको हो ।
