काठमाडौं, ६ असोज । काठमाडौंको त्रिपुरेश्वरमा बस चालक अर्जुन दोङले आत्मदाह प्रयास गरी ज्यान गुमाएको घटनाप्रति यातायात व्यवसायी तथा मजदुर संघसंस्थाहरूले गम्भीर आपत्ति जनाएका छन्।
मंगलबार संयुक्त विज्ञप्ति जारी गर्दै उनीहरूले ट्राफिक प्रहरीको नियन्त्रणमा रहेका बेला चालकले आत्मदाह गर्नु गम्भीर लापरबाही भएको दाबी गर्दै घटनाको न्यायिक छानबिन, दोषीमाथि कारबाही तथा मृतक परिवारलाई राहत र उचित क्षतिपूर्ति दिन माग गरेका छन्।
संघसंस्थाका अनुसार हर्न बजाएको विषयमा ट्राफिक प्रहरीले दोङलाई नियन्त्रणमा लिई करिब दुई घण्टासम्म बससमेत रोकेको थियो। त्यस क्रममा मानसिक दबाब र हैरानीका कारण उनले आत्मदाह गरेको उनीहरूको जिकिर छ। प्रहरीले घटनाबारे गर्ने अनुसन्धान र आधिकारिक निष्कर्ष भने यस दाबीबाट अलग हुन सक्ने भएकाले तथ्य छानबिनबाट स्पष्ट हुनुपर्ने देखिन्छ।
उनीहरूले मृतक परिवारसँगै जलेर क्षति भएको बसधनीलाई क्षतिपूर्ति, यातायात श्रमिकलाई श्रम ऐन र सामाजिक सुरक्षामा आबद्धता, ट्राफिक प्रहरीको व्यवहारमाथि छानबिन तथा २४ घण्टे हेल्पलाइन र द्रुत सुनुवाइ संयन्त्र स्थापना गर्नेलगायत ९ बुँदे माग अघि सारेका छन्।
माग पूरा नभए संयुक्त संघर्ष समितिमार्फत थप शान्तिपूर्ण आन्दोलनका कार्यक्रम घोषणा गर्ने चेतावनी पनि उनीहरूले दिएका छन्।
