धनवीर पुनमगर, नयाँदिल्ली ।
मूल प्रवाह अखिल भारत नेपाली एकता समाज कोयम्बटोरका नगर समितिका सदस्य रेशम थापाले आफू संस्थापन पक्षमै रहेको बताउनुभएको छ ।
मूल प्रवाह एकता समाजबाट अनुशासनको कारबाहीमा परी निष्काशित तत्त्वहरूले नसोधिकनै उनीहरूको समितिमा राखेपछि थापाले स्पष्टीकरण सार्वजनिक गर्दै आफू संस्थापन पक्षमै रहेको जानकारी गराउनुभएको हो ।
आज अगस्त १४, २०२१ का दिन सार्वजनिक गर्नुभएको स्पष्टीकरणमा उहाँले आफू अनुशासनविहीन तत्त्वहरूको गुटमा नरहेको तथा दुर्गाबहादुर केसी केन्द्रीय अध्यक्ष र चन्द्रबहादुर थापा क्षेत्रीय अध्यक्ष रहेको मूल प्रवाहको संस्थापन पक्षमा रहेको बताउनुभएको छ ।
यस्तो छ, उहाँले सार्वजनिक गर्नुभएको स्पष्टीकरण
“म रेशम थापा लामो समयदेखि मूल प्रवाह अखिल भारत नेपाली एकता समाजको कोयम्बटोर नगर समिति र दक्षिण भारत क्षेत्रीय समितिमा रही सङ्गठनात्मक कार्यमा निरन्तर क्रियाशील छु । अहिले सङ्गठन विरोधी अराजक तत्त्वले आफ्नो मनमानी तरिकाले मलाई नसोधिकन सङ्गठनबाट कारबाहीमा परेका देवबहादुर लामिछाने र महेन्द्र बस्यालको विरोधी गुटले झुटा समाचार फैलाएको रहेछ । त्यो झुट, फुटपरस्त तत्त्वको गुटमा नरहेको र यसै संस्थापन मूल प्रवाह अखिल भारत नेपाली एकता समाज अर्थात् केन्द्रीय अध्यक्ष दुर्गाबहादुर केसी र क्षेत्रीय अध्यक्ष चन्द्रबहादुर थापा भएकै सङ्गठनमा निरन्तर रहेको जानकारी गराउँछु ।”
