काठमाडौँ । न्यूखिम्ती सबस्टेसनमा चार्ज हुँदा माथिल्लो तामाकोशी जलविद्युत् आयोजनाले उत्पादन गरेको बिजुली काठमाडौँ ल्याउन सहज हुने भएको छ ।
स्वदेशी लगानीमा निर्मित देशको हालसम्मकै ठुलो आयोजनाको बिजुली काठमाडौँ उपत्यका भित्राउनका लागि महत्त्वपूर्ण मानिएको उक्त सबस्टेसन सफलतापूर्वक चार्ज भएको माथिल्लो तामाकोशी हाइड्रोपावर लिमिटेडका प्रमुख कार्यकारी अधिकृत विज्ञानप्रसाद श्रेष्ठले जानकारी दिनुभयो ।
रामेछापको फुलासीमा निर्माण गरिएको उक्त सबस्टेसनको क्षमता २२०÷१३२ केभीको छ । ‘सबस्टेसन साउन २४ गते चार्ज भई काठमाडौँसम्म बिजुली जोडिएको छ । यो आयोजनाका लागि अर्को महत्त्वपूर्ण सफलता हो’ श्रेष्ठले भन्नुभयो ।
उहाँका अनुसार ढल्केबरपछि यो सबस्टेसन अर्को ठुलो हो । ढल्केबर ४०० केभी र न्यूखिम्ती २२० केभी क्षमताको हो । प्रमुख कार्यकारी अधिकृत श्रेष्ठले लामोसाँघु–काठमाडौँ प्रसारण लाइनमार्फत तत्काल ९० मेगावाट बिजुली प्रवाह गरिएको बताउनुभयो ।
कुल ४५६ मेगावाट क्षमताको तामाकोशीका हाल चार युनिट सञ्चालनमा आएका छन् । एउटा युनिटको क्षमता ७६ मेगावाटको छ भने हाल त्यहाँबाट ३०४ मेगावाट बिजुली उत्पादन गरिएको छ । अन्य दुई युनिट पनि छिट्टै सञ्चालनमा ल्याइने तयारीे छ ।
उक्त सबस्टेसनमा १०० केभी क्षमताको चार वटा पावर ट्रान्सफर्मर जडान गरिएको छ । जडान गरिएका ट्रान्सर्फरमध्ये तीन वटा नियमित सञ्चालनमा ल्याइने र एउटा जगेडामा राखिने छ । माथिल्लो तामाकोशीको बिजुली हाल खिम्ती–ढल्केबर प्रसारण लाइनमार्फत ढल्केबर पुगेपछि देशभर वितरण हुन्छ । आयोजना झन्डै ११ वर्षपछि सम्पन्न भएको हो ।
सुरुवाती लागत रु ३५ अर्ब भए पनि प्राकृतिक विपत्ति, भारतको सीमानाकामा अवरोध तथा डिजाइनमा भएको परिवर्तन, अमेरिकी डलरमा भएको मूल्यवृद्धि तथा ठेकेदारको बदमासीका कारण लागत बढेर रु ८४ अर्बको हाराहारीमा पुगेको छ । यो आयोजनाले स्वदेशी लगानीमै ठुला आयोजना निर्माण गर्न सकिन्छ भन्ने विश्वास दिलाएको छ । (रासस)
