काठमाडौं । राष्ट्रिय जनमोर्चाका अध्यक्ष चित्रबहादुर केसीले केपी ओली नेतृत्वको सरकार हटे पनि राष्ट्रियता र गणतन्त्रमाथिको खतरा नटरेको बताउनुभएको छ । युगदर्शनलाई दिएको अन्तर्वार्तामा अध्यक्ष केसीले अहिले पनि राष्ट्रियतामाथि उत्तिकै खतरा रहेको र प्रधानमन्त्री शेरबहादुर देउवाले राष्ट्रियताको संरक्षण गर्न नसक्ने बताउनुभएको छ ।
केसीले शेरबहादुर देउवा र पुष्पकमल दाहाललाई जनताको नचिनेर, उनीहरूको विगत थाह नभएर कार्यगता एकता गरेको नभइ ओलीको प्रतिगामी कदमलाई रोक्न कार्यगत एकता गर्नुपरेको प्रष्ट पार्नुभएको छ ।
‘पाँच दलमा सम्मिलत पार्टीरूको इतिहास, उनीहरूको विगत, उनीहरूका गतिविधि राष्ट्रिय जनमोर्चाले नबुझेको, नजानेको होइन । उनीहरूसँग सहकार्य नगरिकन ओलीको प्रतिगमनकारी क्रियाकलापलाई रोक्न सम्भव हुँदैनथ्यो । त्यसो भएको हुनाले उनीहरूसँग सहकार्य गरेर प्रतिगमनलाई हामीले हराउन सफल भयौं । प्रतिगमनलाई पराजय गर्ने बेलासम्म उनीहरुसँग हाम्रो सहकार्य हो । अब उनीहरूका कारण फेरि सिमित अधिकार गणतन्त्र, धर्मनिरपेक्षता जस्ता विषय उल्टिने छैनन् भन्न सकिँदैन’ केसीले भन्नुभएको छ ।
यस्तै, उहाँले वर्तमान सरकारले पनि पूर्ववर्ती सरकारले जस्तै, अंगीकृतका सन्तानलाई बंसजको नागरिकता दिने, चुरेका ढुंगा भारत निकासी गर्ने, एमसीसी अगाडि बढाउने जस्ता काम गर्न सक्ने बताउनुभयो । त्यो अवस्थामा राष्ट्रिय जनमोर्चाले वर्तमान सरकार विरुद्ध संघर्ष गर्ने पनि स्पष्ट पार्नुभएको छ ।
‘अहिले जो सत्तामा आएका छन् यिनीहरुको नचिनेका विष्ट होइनन् । देशको अखण्डता, राष्ट्रियता, सुशासन जस्ता विषयमा देउवा–प्रचण्डलाई नेपाली जनताले भोगेकै जानेकै छन्’ केसीले भन्नुभयो, ‘यदि उनीहरूले पनि राष्ट्र र जनताका लागि विगतका गल्ती सच्याउँदै काम गरेनन्, जनतालाई सुशासन दिन सकेनन् भने उनीहरुका विरुद्ध फेरि पनि संघर्ष गर्नुको हामीसँग विकल्प रहँदैन ।’
अध्यक्ष केसीले प्रतिगमनलाई परास्त गरेपछि अब संघीयताविरुद्ध आन्दोलन संगठित गर्ने पनि स्पष्ट पार्नुभएको छ ।
(प्रतिक्षा गर्नुहोस् अन्तर्वार्ता ।)
