काठमाडौँ । अमेरिकामा एकैदिन दुई लाखभन्दा बढी सङ्क्रमित थपिएका छन् । आज बिहानसम्मको चौबिस घण्टाभित्र त्यहाँ दुई लाख एक हजार ८३ जना नयाँ सङ्क्रमित थपिएका हुन् ।
वल्र्डोमिटर्सका अनुसार त्यहाँ हिजो बिहानसम्मको चौबिस घण्टामा एक लाख ९२ हजार ६३३ नयाँ सङ्क्रमित थपिएका थिए भने अस्ति बिहानसम्मको चौबिस घण्टामा एक लाख ७६ हजार ८४९ जना नयाँ सङ्क्रमित थपिएका थिए ।
यससँगै कुल सङ्क्रमितको सङ्ख्या १ करोड २२ लाख ७४ हजार ७२६ पुगेका छन् ।
अमेरिकाको टेक्सास र क्यालिफोर्निया राज्यमा सबैभन्दा बढी सङ्क्रमित रहेका छन् । आज बिहानसम्मको तथ्याङ्कमा टेक्सासमा ११ लाख ६१ हजार २१९ र क्यालिफोर्नियामा १० लाख ९४ हजार ८३ जना कुल सङ्क्रमित रहेका छन् ।
त्यस्तै, आज बिहानसम्मको चौबिस घण्टामा १९ सय ५१ जना मृतक थपिएसँगै कुल मृतकको सङ्ख्या दुई लाख ६० हजार २८३ पुगेको छ ।
हालसम्म अमेरिकामा ७३ लाख १६ हजार ३२३ जना डिस्चार्ज भएका छन् भने ४६ लाख ९८ हजार १२० जना सक्रिय सङ्क्रमित रहेका छन् । त्यसमध्ये गम्भीर बिरामीको सङ्ख्या २२ हजार ७८९ रहेको छ ।
