काठमाडौँ । सरकारले भोलि (२०७७ कात्तिक ७ गते) देखि टेलिभिजन प्रशारणमा विज्ञापनरहित प्रशारण (क्लिन फिड) लागू गर्ने निर्णय गरेको छ । यही कात्तिक ४ गते बसेको मन्त्रिपरिषद् बैठकले कात्तिक ७ देखि क्लिन फिड लागू गर्ने निर्णय गरेको सरकारका प्रवक्ता एवम् सञ्चार तथा सूचना प्रविधिमन्त्री पार्वत गुरुङले जानकारी दिनुभयो ।
मन्त्रिपरिषद् बैठकका निर्णय सार्वजनिक गर्न बिहिबार आयोजित पत्रकार सम्मेलनमा मन्त्री गुरुङले क्लिन फिड लागू हुने प्रेसविज्ञप्ती पढेर सुनाउँदै निर्णयलाई सरकारले गरेको ‘ऐतिहासिक निर्णय’ भएको बताउनुभयो । मन्त्री गुरुङले २०७६ कात्तिक ६ गतेदेखि लागु भएको विज्ञापनको नियमन गर्ने ऐन–२०७६ को दफा ६ मा विज्ञापनरहित प्रशारण गर्नुपर्ने व्यवस्था रहेका स्मरण पनि गराउनुभयो ।
उहाँले भन्नुभयो– ‘‘नेपालमा प्रशारण हुने विदेशी च्यानलहरूले विज्ञापनरहित क्लिन फिड प्रशारण गर्नुपर्ने र ऐन प्रारम्भ हुँदाका बखतमा विदेशी च्यानलसँग डबिङ गरी प्रशारण गर्न सम्झौता गरिसकेका संस्थाहरूले ऐन प्रारम्भ भएको एक वर्ष, अर्थात् २०७७ कात्तिक ७ गतेभित्र विज्ञापनरहित क्लिन फिड प्रशारण गर्नुपर्ने, विदेशी विज्ञापनलाई नेपाली सञ्चार माध्यमहरूले डबिङ गरी प्रशारण गर्न नपाउने कानुनी व्यवस्था रहेको छ।’
मन्त्रालयका सहसचिव डिल्लिराम शर्माको अध्यक्षतामा विज्ञापन बोर्ड गठन भइसकेको छ । नवगठित विज्ञापन बोर्डले क्लिन फिड लागू भए नभएको सम्बन्धमा अनुगमन गर्न आवश्यक तयारी पुरा गरिसकेको छ । कात्तिक ८ गते देखि नेपालमा क्लिन फिड लागू नगर्ने कुनैपनि सेवाप्रदायकलाई कानुन अनुसार कारबाही गरिने पनि मन्त्री गुरुङले बताउनुभयो ।
