काठमाडौं । पछिल्लो २४ घण्टामा नेपालमा तीन हजार सात सय ९० जना कोरोना संक्रमित थपिएका छन् । सोमबार स्वास्थ्य तथा जनसंख्या मन्त्रालयले गरेको प्रेस ब्रिफिङका क्रममा प्रवक्ता प्रा डा. जागेश्वर गौतमले १५ हजार सात सय १४ जनामा गरिएको पीसीआर परीक्षणका क्रममा सो संख्यामा कोरोना संक्रमित भेटिएको जानकारी दिनुभयो ।
पछिल्लो २४ घण्टामा दुई हजार तीन सय ३५ जना डिस्चार्ज भएका छन् । यो सँगै आजसम्म डिस्चार्ज हुनेको संख्या ९४ हजार ५०१ पुगेको छ । डा. गौतमका अनुसार नेपालमा आज सक्रिय संक्रमितको संख्या ४० हजार ७ सय ७८ पुगेको छ ।
यस्तै, आज संस्थागत आइसोलेसनमा १३ हजार ८ सय ५१ र होम आइसोलेसनमा २६ हजार ९ सय २७ जना रहेका छन् । यस्तै, काठमाडौं उपत्यकामा पछिल्लो २४ घण्टामा दुई हजार तीन सय ८८ जना कोरोना भाइरसका संक्रमित थपिएका छन् ।
डा. गौतमका अनुसार काठमाडौंमा दुई हजार ८, ललितपुरमा दुई सय ८१ र भक्तपुरमा ९९ जनामा संक्रमण पुष्टि भएको छ ।
