काठमाडौँ । नेपालमा पछिल्लो २४ घण्टामा २ हजार ७१ जनामा कोरोना सङ्क्रमण पुष्टि भएको छ । आइतबार स्वास्थ्य तथा जनसङ्ख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले देशभरमा २ हजार ७१ थप जनामा कोरोना भाइसरको सङ्क्रमण पुष्टि भएको जानकारी दिनुभयो ।
आज देशभरका प्रयोगशालामा थप १२ हजार ७२७ पिसिआर परीक्षण गरिएको थियो ।
प्रवक्ता गौतमका अनुसार आज देशभरमा सक्रिय सङ्क्रमितको सङ्ख्या ३१ हजार ३१५ रहेको छ । त्यस्तै १३ हजार ६४९ जना संस्थागत आइसोलेसनमा रहेका छन् ।
त्यस्तै पछिल्लो २४ घण्टामा थप १ हजार ५५२ जना कोरोना सङ्क्रमित निको भएको प्रवक्ता गौतमले जनाकारी दिनुभयो । योसँगै नेपालमा कोरोना सङ्क्रमण निको हुनेको सङ्ख्या ७५ हजार ८०४ पुगेको छ ।
उपत्यकामा १४ सय १६ सङ्क्रमित थपिए
काठमाडौँ उपत्यकामा पछिल्लो २४ घण्टामा थप १ हजार ४१६ जनामा कोरोना भाइरसको सङ्क्रमण पुष्टि भएको छ । मन्त्रालयका प्रवक्ता प्राडा गौतमले उपत्यकाका तीन जिल्लामा १ हजार ४१६ थप जनामा कोरोना भाइसरको सङ्क्रमण पुष्टि भएको बताउनुभयो ।
प्रवक्ता गौतमका अनुसार उपत्यकाका काठमाडौँमा १ हजार १४५ भक्तपुरमा ११० र ललितपुरमा१६१ जनामा कोरोना पुष्टि भएको हो ।
आज एकैदिन २२ जनाको मृत्यु
नेपालमा कोरोना सङ्क्रमणबाट थप २२ जनाको मृत्यु भएको छ । स्वास्थ्य मन्त्रालयले दिएको जानकारी अनुसार सङ्क्रमणबाट पछिल्लो २४ घण्टामा थप २२ जनाको मृत्यु भएको हो ।
मन्त्रालयका अनुसार मृत्यु हुनेमा ५ महिला र १७ जना पुरुष रहेका छन् । योसँगै नेपालमा कोरोना सङ्क्रमणबाट मृत्यु हुनेको सङ्ख्या ६३६ पुगेको छ ।
