थिम्पू । सिन्टाफू हिमताल फुटेको आशङ्कासँगै भुटानमा कात्तिक १२ गते राति ठुलो बाढी आएको छ ।

बाढीले गासा जिल्लाको छाचु क्षेत्र पूर्ण रूपमा बगाएको छ भने मो छू नदीमा आएको बाढीले पुनाखा जिल्लास्थित सौर्य सिँचाइ प्रणालीमा क्षति पुर्‍याएको छ ।

बाढीसँगै बगेर आएको गेग्रानले जोमलिङथाङ क्षेत्रमा पुनाखागासा राजमार्गको एक खण्ड बगाएको छ । बाढीले लाया गेओगको सडकअन्तर्गत टोङचुद्राक खण्डको केही भाग बगाएको र सडक अवरुद्ध भएपछि लाया क्षेत्र देशका अन्य भागसँगको सडक सम्पर्कबाट विच्छेद भएको भुटान ब्रोडकास्टिङ सर्भिसले जनाएको छ ।

बाढीका कारण मानवीय क्षति भएको विवरण अहिलेसम्म प्राप्त भएको छैन । रातिको समयमा बाढी आएकाले तत्काल क्षतिको पूर्ण विवरण सङ्कलन गर्न नसकिएको अधिकारीले जनाएका छन् । सुरक्षाकर्मी तथा सम्बन्धित निकायले प्रभावित क्षेत्रको अवस्था र नदीको जलस्तर निरन्तर निगरानी गरिरहेका छन् ।

सिन्ताफू हिमताल फुटेको हुन सक्ने

सिन्ताफू हिमताल भुटानको गासा जिल्लास्थित लाया गेओगको लुङ्गो क्षेत्रमा वाकिला हिमालको फेदीमा पर्दछ । यो हिमताल देशका १७ सम्भावित जोखिमयुक्त हिमतालमध्ये एक हो । यो ताल मो छू नदीको मुहान क्षेत्रमा पर्छ । बाढी पनि मो छू नदीमा आएकाले ताल विष्फोटको आशङ्का गरिएको हो ।

सामाजिक सन्जालमा सार्वजनिक केही तस्बिरमा हिमतालबाट पानी बाहिरिएजस्तो देखिन्छ तर त्यसको आधिकारिकता पुष्टि हुन बाँकी छ ।
प्रभावितलाई अग्लो स्थानमा सारियो

बाढीको जोखिमलाई ध्यानमा राख्दै प्रभावित क्षेत्रका सेना, कर्मचारी र स्थानीयलाई सुरक्षित स्थानमा सारिएको छ । ताक्तिसमाखाङमा खटिएका सैनिक, परियोजना कार्यालयका कर्मचारी तथा गासा छाचु क्षेत्रमा रहेका व्यक्तिलाई सुरक्षित स्थानमा जान निर्देशन दिइएको छ ।

गासा छाचुको तातोपानी कुण्डमा रहेका कर्मचारी र आगन्तुकलाई पनि सुरक्षित स्थानमा सारिएको छ । त्यस्तै पुनाखाको येबिसा क्षेत्रमा पनि बाढीको पानी पुगेको छ । पुनाखा सेन्ट्रल स्कुलले आफ्ना सबै आवासीय विद्यार्थीलाई सुरक्षित रूपमा अग्लो स्थानमा सारिएको पुष्टि गरेको छ ।

नदीको जलस्तर निगरानी

भुटानको राष्ट्रिय जलविज्ञान तथा मौसम विज्ञान केन्द्रले मो छू नदीको तासिथाङ र येबेसा क्षेत्रमा पानीको सतह निगरानी गरिरहेको छ ।

मो छू नदी र पुनात्साङछु नदीको तल्लो तटीय क्षेत्रमा जडान गरिएका साइरन प्रणाली सक्रिय बनाइएको छ । सम्भावित जोखिममा रहेका छिमेकी जिल्लालाई पनि सतर्क गराइएको छ ।

बाढीको बहावसँगै ढुङ्गा, माटो र अन्य गेग्रान बगेर आउन सक्ने जोखिमलाई ध्यानमा राख्दै पुनात्साङछु–२ जलविद्युत् आयोजनाले आफ्ना विद्युत् उत्पादन गर्ने युनिट बन्द गरेको छ ।

आयोजनाले बाँधका ढोका खोलेर जलाशयको पानीको सतह घटाएको छ । बाढीको पानी र त्यससँगै बगेर आउने गेग्रानलाई सहज रूपमा निकास दिन यस्तो सावधानी अपनाइएको हो ।