रियाद । यमनका हुथी विद्रोहीले साउदी राजधानीमा आक्रमण गरेपछि दुई सातासम्म बन्द रहेको रियाद अन्तर्राष्ट्रिय विमानस्थलमा आइतबारदेखि उडान पुन: सुरु भएका छन् यद्यपि इरान समर्थित यस समूहले आगामी दिनमा थप आक्रमण हुन सक्ने चेतावनी दिएको छ ।
‘फ्लाइट राडार’ नामक अनुगमन साइटले आइतबार बिहान रियाद विमानस्थलबाट एउटा विमान उडेर साउदी सहर जेद्दाह तर्फ गइरहेको देखाएको छ ।
साउदी अरब र उसले समर्थन गरेको यमनको अन्तर्राष्ट्रिय रूपमा मान्यता प्राप्त सरकारले लामो समयदेखि कायम रहेको युद्धविराम यसै गर्मीयाममा भङ्ग भएपछि, हालैका सातामा हुथी विद्रोहीको निरन्तर आक्रमणको सामना गरिरहेका छन् । यो द्वन्द्वले अमेरिका र इरानबिचको व्यापक टकरावको केन्द्रबिन्दुलाई यमनतर्फ मोडिदिएको छ र विश्वकै गरिब मुलुकमध्ये एक यमनमा मानवीय सङ्कटलाई अझ गहिरो बनाएको छ ।
रियादस्थित किङ खालिद अन्तर्राष्ट्रिय विमानस्थलले शनिबार एक्समा पोस्ट गर्दै जानकारी दिएअनुसार अक्टोबर २५ देखि लागु हुने गरी टर्मिनल (१) लाई आन्तरिक उडानका लागि र टर्मिनल (२) लाई राष्ट्रिय वायुसेवा कम्पनीद्वारा सञ्चालित अन्तरराष्ट्रिय उडानका लागि तोकिएको छ ।
हुथी विद्रोहीले रियाद विमानस्थललाई लक्षित गरी पटक–पटक आक्रमण गरेका छन् । यसै महिना भएको एउटा आक्रमणमा १३ जनाको मृत्यु हुनुका साथै ३०० भन्दा बढी मानिस घाइते भएका थिए । यो साउदी अरबमा विगत एक दशकभन्दा बढी समययताकै सबैभन्दा घातक आक्रमण थियो ।
यता, हुथी विद्रोहीका सैन्य प्रवक्ता याह्या सारीले विमानस्थल अझै पनि असुरक्षित रहेको र यो एउटा सैन्य लक्ष्य भएको चेतावनी दिएका छन् ।
उनले भने– ‘यमनी सशस्त्र बलले सबै अन्तर्राष्ट्रिय, क्षेत्रीय र स्थानीय वायुसेवा कम्पनी, साथै त्यहाँका कर्मचारी र यात्रुलाई रियादस्थित किङ खालिद विमानस्थल प्रयोग नगर्न चेतावनी दिन्छन् किनकि यो असुरक्षित छ र हाम्रा सेनाका लागि सैन्य लक्ष्यको रूपमा रहेको छ ।’
हुथी विद्रोहीसँग लडिरहेको साउदी नेतृत्वको सैन्य गठबन्धनले आइतबार बिहान रियाद क्षेत्रमा दुइटा ड्रोन खसालेको जनाएको छ । (रासस/एएफपी)
