काठमाडौँ । मूल प्रवाह अखिल भारत नेपाली एकता समाजले आफ्ना पूर्व केन्द्रीय कोषाध्यक्ष जयबहादुर मल्लको असामयिक निधनप्रति श्रद्धाञ्जली व्यक्त गरेको छ ।
अध्यक्ष प्रेम पौडेलको हस्ताक्षरमा अक्टोबर ६, २०२६ तदनुसार २०८३ असोज २० गते मङ्गलबार शोकवक्तव्य सार्वजनिक गर्दै मूल प्रवाहले श्रद्धाञ्जली र शोकसन्तप्त परिवारप्रति समवेदना व्यक्त गरेको हो ।
शोकमन्तव्यमा मूल प्रवाहको सन् १९८९ मा सम्पन्न तृतीय अखिल भारत सम्मेलनबाट केन्द्रीय समितिमा आएर केन्द्रीय कोषाध्यक्षसमेत बनेको तथा सन् २०१० देखि २०१५ सम्म पेसेवर कार्यकर्ताको रूपमा काम गरेको समेत बताइएको छ ।
यस्तो छ, शोकमन्तव्यको पूर्ण पाठ :
“पूर्व केन्द्रीय कोषाध्यक्ष जयबहादुर मल्लको यही अक्टोबर ५, २०२६ का दिन हृदयघातका कारण भएको दु:खद निधनबाट मूल प्रवाह अखिल भारत नेपाली एकता समाज स्तब्ध भएको छ ।
उहाँ रोजगार खोजीको क्रममा भारतको चेन्नई, मुम्बईलगायतका विभिन्न स्थानमा कार्यरत हुनुहुन्थ्यो । त्यसै क्रममा हाम्रो सङ्गठनमा आबद्ध भई सङ्गठनका विभिन्न जिम्मेवारी वहन गर्दै गर्दा तृतीय अखिल भारत सम्मेलनबाट केन्द्रीय समितिमा निर्वाचित हुनुभएको थियो । पछि उहाँले केन्द्रीय कोषाध्यक्षको जिम्मेवारीसमेत निर्वाह गर्नुभयो ।
नोकरीबाट अवकाश लिएर उहाँ स्वदेश जानुभयो । त्यहाँ राष्ट्रिय जनमोर्चामा सक्रिय रहनुभएको थियो । पछिल्लो समयमा उहाँ राजमोको सुदूरपश्चिम प्रदेश समितिको सदस्य तथा कञ्चनपुर जिल्ला समितिको सल्लाहकरा हुनुहुन्थ्यो । सन् २०१० देखि २०१५ सम्म उहाँले भारतमा मूल प्रवाहको पेसेवर कार्यकर्ताको रूपमा पनि काम गर्नुभएको थियो । केही समयदेखि उहाँ अस्वस्थ हुनुहुन्थ्यो ।
मल्लको असामयिक दु:खद निधनले हामीलाई मर्माहत बनाएको छ । हाम्रो सङ्गठन जयबहादुर मल्लप्रति श्रद्धाञ्जली अर्पण गर्नुका साथै शोकसन्तप्त परिवारजनमा समवेदना प्रकट गर्दछ ।”