काठमाडौँ । राष्ट्रिय जनमोर्चाका केन्द्रीय सल्लाहकार आनन्द शर्माले जेनजी आन्दोलनले असर नपारेको पार्टी नेकपा (मसाल) मात्रै भएको दाबी गर्नुभएको छ ।

२०८३ भदौ ३१ गते अबेर राति मलेसिया नेपाली एकता समाजको भर्चुअल माध्यमबाट सम्पन्न आठौँ राष्ट्रिय भेलालाई सम्बोधन गर्ने क्रममा उहाँले सो धारणा व्यक्त गर्नुभएको हो ।

उहाँले भन्नुभयो– ‘हामी दाबीसाथ भन्छौँ, जेनजी आन्दोलनबाट ठुला भनिएका पार्टीहरू अस्तित्वको सङ्कटमा छन् तर नेकपा (मसाल) मात्रै त्यसको दुष्प्रभावबाट बचेको छ ।’

राजनीतिक भेटघाटको क्रममा समेत विभिन्न दलका नेताहरूले सो स्वीकारोक्ति दिने गरेको उहाँले खुलासा गर्नुभयो ।

‘हामी विभिन्न राजनीतिक दलका नेताहरूसित भेटघाट गर्ने गरेका छौँ’ उहाँले भन्नुभयो– ‘त्यस क्रममा उहाँहरूको भनाइ हुने गर्दछ, जेनजी आन्दोलनले हाम्रो पार्टीलाई त ध्वस्त बनायो, तपाईंहरूको पार्टी मात्रै सिङ्गो छ ।’

नेपालमा जेनजी आन्दोलन र वर्तमान सरकारबारे स्पष्ट धारणा राख्ने पार्टी मसाल मात्रै भएको उहाँले स्पष्ट पार्नुभयो ।

उहाँले भन्नुभयो– ‘गत वर्ष भदौ २४ गतेको ध्वंसमा विदेशी घुसपैठ थियो; जेनजी आन्दोलनमा अमेरिकी सहयोग थियो र अहिलेको सरकार गठन पनि अमेरिकी योजनाअनुसार नै भएको हो भन्नेमा हामी स्पष्ट छौँ ।’

उहाँले बालेन्द्र सरकारबारे तीनोटा तथ्य राख्नुभयो– ‘प्रथम– यो सरकार फासीवादी शैलीमा अगाडि बढिरहेको छ । द्वितीय यो सरकार गरिबमारा तर कर्पोरेट घरानाको पक्षमा छ । तृतीय– यो सरकार अमेरिकाको कठपुतली हो ।’

‘हाम्रो स्पष्ट मत छ, यो सरकार अमेरिकाको हितसाधन गर्ने अर्थात् अमेरिकाको पक्षमा काम गर्ने कठपुतली सरकार हो’ नेता शर्माले भन्नुभयो ।

मुस्ताङको युरोनियम उत्खनन्को जिम्मा पछिल्लो सुशीला कार्की सरकारले अमेरिका र अस्टे्रलियालाई दिएको समाचारको प्रसङ्ग जोड्दै उहाँले बालेन्द्र सरकार पनि त्यही बाटोमा जान सक्ने बताउनुभयो ।

आफूहरूले मुस्ताङको युरेनियम खानीको दुरुपयोग हुन सक्ने र अमेरिकाले त्यसलाई चीनको विरुद्धमा नेपाललाई उपयोग गर्न सक्ने सम्भावना पहिलेदेखि नै बताएको स्मरण उहाँले गर्नुभयो ।

‘मुस्ताङको युरोनियम खानीको पूर्व, उत्तर र पश्चिममा चीन छ, दक्षिणमा मात्रै नेपाल छ’ उहाँले भन्नुभयो– ‘अमेरिकाले त्यो युरोनियम खानी आफूले कब्जा गर्न चाहान्छ । उसले त्यसलाई चीनको विरुद्धमा प्रयोग गर्न चाहान्छ ।’

मसाल र राजमोले देशको यस खालको राष्ट्रियतासँग जोडिएका विषयमा समान धारणा राख्ने राजनीतिक पार्टी, सङ्घसंस्था र बुद्धिजीवीसित सहकार्य गर्ने प्रयास गरिरहेको जानकार पनि दिनुभयो ।

उहाँले भन्नुभयो– ‘हामीले पछिल्लो समयमा राजनीतिक भेटघाटलाई तीव्रता दिएका छौँ । सो भेटमार्फत देशका सामु उत्पन्न गम्भीर खतराको सामना गर्न संयुक्त आन्दोलन उठाउन प्रयास गरिरहेका छौँ ।’

नेता शर्माले अहिले देशको लोकतन्त्र, राष्ट्रियता, धर्मनिरपेक्षता समेतमाथि गम्भीर खतरा देखिएकाले संयुक्त आन्दोलन आवश्यक रहेको तर्क गर्नुभयो ।