काठमाडौँ । प्रधानमन्त्री बालेन्द्र शाहले संयुक्त राष्ट्र सङ्घको एकासिऔँ महासभामा सम्बोधन गर्ने भएका छन्न ।
सेप्टेम्बर २४, २०२६ तदनुसार २०८३ असोज ८ गते महासभामा प्रधानमन्त्रीले सम्बोधन गर्ने भएका हुन् ।
सेप्टेम्बर २२ बाट सुरु हुने महासभामा प्रधानमन्त्री शाहले तेस्रो दिन साँझ सम्बोधन गर्ने तयारी भएको हो, यद्यपि अहिलेसम्म टुङ्गो लागिसकेको भने छैन ।
मन्त्रालय स्रोतका अनुसार प्रधानमन्त्री शाहले असोज ८ गते सम्बोधन गर्ने गरी तयारी भने भइरहेको छ । प्रधानमन्त्री शाह लामो समय नबस्ने गरी भ्रमणको तयारी भइरहेको बताइएको छ ।
भ्रमण बढीमा तीन दिन हुने गरी छलफल भइरहेको छ । अघिल्लो दिन पुगेर भोलिपल्ट सम्बोधनपछि फर्किहाल्ने गरी छलफल भइरहेको छ ।
राष्ट्र सङ्घ मुख्यालयले नेपालका लागि तय गरेको समयतालिकाअनुसार नै प्रधानमन्त्रीले सम्बोधन गर्न लागेका हुन् । न्युयोर्कस्थित नेपाली मिसनले उक्त समयबारे परराष्ट्र मन्त्रालयलाई जानकारी पठाएको थियो । त्यही जानकारी परराष्ट्रले प्रधानमन्त्री कार्यालयमा पठाएको छ र प्रधानमन्त्री बालेनले त्यही समयअनुसार सम्बोधन गर्न लागेका छन् ।
प्रधानमन्त्री कार्यालयबाट भ्रमण टोलीमा ५ जना रहने भएका छन् । प्रधानमन्त्री बालेनका सल्लाहकार कुमार बेन, निजी सचिव तथा सहसचिव प्रदीप परियार, सल्लाहकार टिमबाट सुवास शर्मालगायत भ्रमणमा रहने तय भएको छ । त्यसबाहेक चिफ अफ प्रोटोकल र सुरक्षा टोली हुनेछ । त्यसरी हेर्दा बढीमा १० जनाको टोली हुने सम्भावना देखिन्छ । प्रधानमन्त्रीसँगै परराष्ट्रमन्त्री शिशिर खनाल पनि सहभागी हुनेछन् ।
अर्कोतर्फ, परराष्ट्र मन्त्रालयबाट खनाल, परराष्ट्र सचिव अमृत राईसहित पाँच जनाको टोली भ्रमणमा जाने तय भइसकेकाले महासभामा जाने टोलीको सङ्ख्या बढीमा १५ जना हुने पनि बताइएको छ ।
महासभामा सम्बोधन गर्न लागेका प्रधानमन्त्री बालेनले थप साइडलाइन भेट गर्ने सम्भावना भने कम रहेको बताइएको छ । परराष्ट्र मन्त्रालय र प्रधानमन्त्री कार्यालयका अधिकारीका अनुसार बालेन महासभामा सम्बोधन गरेर फर्किहाल्ने मुडमा रहेका कारण थप साइडलाइन वार्ताका लागि प्रयास पनि भइरहेको छैन ।
