काठमाडौँ । सरकारले भदौ २२ गते राष्ट्रिय शोकदिवससँगै रसुवा बाढीलगायतका विभिन्न विषयमा सातोटा निर्णय गरेको छ ।
२०८३ भदौ १८ गते बिहीबार प्रधानमन्त्री तथा मन्त्रिपरिषद्को कार्यालय सिंहदरबारमा बसेको मन्त्रिपरिषद् बैठकले सो निर्णय गरेको हो ।
रसुवाबाढीका बेपत्ताको खोज तथा उद्धार कार्यमा खटिएका सुरक्षाकर्मी र राष्ट्रसेवक कर्मचारीलाई जोखिमभत्ता, खाजाखर्च, घाइते भएमा नि:शुल्क उपचार तथा मृत्यु भएमा परिवारलाई प्रति मृतक १० लाख रुपैयाँ राहत उपलब्ध गराउने सरकारको निर्णय छ ।
बैठकले भदौ २२ गते राष्ट्रिय शोकदिवस मनाउनेदेखि २३ गते जेनजी सहिद दिवससम्म मनाउने निर्णय गरेको हो ।
यस्ता छन् मन्त्रिपरिषद् बैठकका निर्णय :
१. एसियाली विकास बैङ्कबाट भोटेकोशी बाढी प्रभावित नागरिकको जीवनरक्षा, तत्काल उद्धार तथा राहतका लागि प्राप्त हुने पाँच मिलियन अमेरिकी डलर (५० लाख डलर) अनुदान सहायता स्वीकार गर्ने ।
२. रसुवाको भोटेकोशी बाढीबाट प्रभावित व्यक्ति, उद्योग, व्यापार तथा व्यवसायलाई तत्काल सुचारु गर्न एकीकृत व्यावसायिक पुनस्र्थापन योजनाअन्तर्गत राहत, कर तथा महसुल छुटलगायतका सहुलियत उपलब्ध गराउने ।
३. साल्ट ट्रेडिङ कर्पोरेसन र खाद्य व्यवस्था तथा व्यापार कम्पनीमार्फत कुल २५ हजार मेट्रिक टन चिनी एक प्रतिशत भन्सार महसुलमा आयात गर्न स्वीकृति दिने ।
४. खोज तथा उद्धार कार्यमा खटिएका सुरक्षाकर्मी र राष्ट्रसेवक कर्मचारीलाई जोखिमभत्ता, खाजा खर्च, घाइते भएमा नि:शुल्क उपचार तथा मृत्यु भएमा परिवारलाई प्रति मृतक १० लाख रुपैयाँ राहत उपलब्ध गराउने ।
५. २०८३ भदौ २३ गते जेनजी सहिद दिवसको अवसरमा देशभर सार्वजनिक बिदा दिने ।
६. भदौ १० गते रसुवाको भोटेकोशी बाढीमा ज्यान गुमाउनेको सम्मानमा तेह्र्रौँ दिनको पुण्यतिथि अर्थात् २०८३ भदौ २२ गते सोमबार राष्ट्रिय शोक मनाउने र सो दिन देशभरका सरकारी कार्यालय तथा विदेशस्थित नेपाली नियोगमा राष्ट्रिय झण्डा आधा झुकाउने ।
७. नेपाल प्रशासन सेवा समूहीकरणतर्फका नारायण प्रसाद भट्टलाई विशिष्ट श्रेणीको सचिव पदमा बढुवा गरी कोशी प्रदेशको मुख्यमन्त्री तथा मन्त्रिपरिषद्को कार्यालयमा मुख्य सचिव पदमा पदस्थापन गर्ने ।
