रोल्पा, भदौ ७ । नेत्रविक्रम चन्द ‘विप्लव’ नेतृत्वको नेकपा (माओवादी) बाट रोल्पाका १३ जना नेता–कार्यकर्ताले पार्टी परित्याग गरेका छन् । पार्टीभित्र फरक मत राख्ने नेतामाथि कारबाही गरिएको भन्दै उनीहरूले असन्तुष्टि जनाउँदै पार्टी छोडेका हुन् ।

केन्द्रीय प्रतिनिधि सदस्य लालबहादुर वली ‘विश्व’ को नेतृत्वमा उनीहरूले पार्टी परित्यागको घोषणा गरेका हुन्। पार्टीकी सचिवालय सदस्य तथा जनयुद्धकालीन चर्चित ‘गोरखा जेल ब्रेक’ घटनाकी योजनाकार उमा भुजेल ‘शिलु’ माथि गरिएको कारबाहीपछि पार्टीभित्र देखिएको आन्तरिक विवादका बीच उनीहरूको विद्रोह सार्वजनिक भएको हो ।

पार्टी छोड्नेमा केन्द्रीय प्रतिनिधि सदस्य वलीसहित जिल्ला कमिटी सचिवालय सदस्य नन्द वली र महेन्द्र वली, जिल्ला सदस्य पूर्णबहादुर वली र धनबहादुर केसी रहेका छन् । त्यस्तै स्थानीय कमिटीका तिलक महरा, मनवीर घर्ती मगर, लोकेन्द्र डाँगी, रुद्र केसी, हिरालाल वली, कमला वली, निर्मला वली र लेखनाथ डिसीले पनि पार्टी परित्याग गर्ने निर्णयमा हस्ताक्षर गरेका छन् ।

उनीहरूले जारी गरेको संयुक्त वक्तव्यमा वर्तमान राजनीतिक परिस्थितिमा क्रान्तिकारी कम्युनिष्ट शक्तिबीच एकता, पुनर्गठन, ध्रुवीकरण र केन्द्रीकरण आवश्यक रहेको उल्लेख गरेका छन्। उनीहरूले विप्लव नेतृत्वको पार्टीले कम्युनिष्ट आन्दोलनको पुनर्गठन र एकताको आवश्यकतालाई आत्मसात् गर्न नसकेको आरोप लगाएका छन्।

वक्तव्यमा जनयुद्ध र जनआन्दोलन हुँदै लामो समयदेखि विप्लव नेतृत्वको पार्टीमा सक्रिय रहे पनि पछिल्लो समय पार्टीभित्र फरक मत राख्ने नेतामाथि कारबाही गर्ने प्रवृत्ति बढेको भन्दै असन्तुष्टि जनाइएको छ ।

हालै बसेको पार्टी बैठकमा स्थायी समिति सदस्य ‘शिलु’ र पिबिएम ‘असल’ले कम्युनिष्ट पार्टीको पुनर्गठन तथा एकताको विषय उठाउँदा त्यसबारे गम्भीर छलफल गर्नुको सट्टा उनीहरूमाथि कारबाही गरिएको भन्दै उनीहरूले आपत्ति जनाएका छन् ।

पार्टी परित्याग गर्ने समूहले अब ‘शिलु’ नेतृत्वको नेपाल कम्युनिष्ट पार्टीमा समाहित हुने घोषणा गरेको छ । उनीहरूले विप्लव नेतृत्वबाट वर्तमान अवस्थामा क्रान्ति सम्पन्न हुन नसक्ने निष्कर्षसमेत सार्वजनिक गरेका छन् ।

संयुक्त वक्तव्यमा पछिल्लो ‘जेनजी’ आन्दोलनपछि मुलुकको राजनीतिक परिस्थिति थप जटिल बनेको उल्लेख गर्दै राष्ट्रियता र जनताको पक्षमा क्रान्तिकारी कम्युनिष्ट शक्तिहरूबीच एकता अपरिहार्य रहेको दाबी गरिएको छ ।

विप्लव नेतृत्वको नेकपा पहिलोपटक आमनिर्वाचनमा सहभागी भएको थियो । उक्त निर्वाचनमा पार्टीले देशभरबाट करिब २३ हजार मत प्राप्त गरेको थियो । त्यसयता पार्टीको राजनीतिक दिशा र नेतृत्व क्षमताबारे पार्टीभित्रै बहस र असन्तुष्टि बढ्दै गएको देखिएको छ ।