काठमाडौँ, साउन २८ । राष्ट्रिय सभा सदस्य तुलप्रसाद विश्वकर्माले देशमा बढ्दो महँगी र ग्यासको कृत्रिम अभाव तत्काल नियन्त्रण गर्न सरकारसँग माग गर्नुभएको छ ।
साउन २८ गते राष्ट्रिय सभाको बैठकमा बोल्दै विश्वकर्माले ग्यासको कृत्रिम अभाव सिर्जना गर्ने कालाबजारी तथा माफियाको खोजी गरी कानुनी दायरामा ल्याउन सरकारको ध्यानाकर्षण गराउनु भएको हो ।
विश्वकर्माले सर्वसाधारणले दैनिक चुलो बाल्नसमेत कठिनाइ भोगिरहेको उल्लेख गर्दै जनतालाई सहज रूपमा ग्यास उपलब्ध गराउन सरकारले तत्काल प्रभावकारी कदम चाल्नुपर्ने बताउनु भयो ।
उहाँले तराईबाट सुरु भएको भनिएको साम्प्रदायिक तनाव विभिन्न जिल्लामा फैलिएको घटनाप्रति पनि सरकार गम्भीर र सचेत हुनुपर्ने बताउनु भयो । मोरङमा भएको घटनालाई आकस्मिक रूपमा मात्र हेर्न नहुने भन्दै विश्वकर्माले यस्ता घटनाका पछाडि लामो समयदेखि भइरहेका गतिविधि र सामाजिक–धार्मिक विभाजनका प्रयासबारे सरकार गम्भीर हुनुपर्ने धारणा राख्नुभयो ।
विश्वकर्माले धार्मिक तथा साम्प्रदायिक द्वन्द्व अत्यन्त संवेदनशील विषय भएको उल्लेख गर्दै जनताबीचको आपसी सद्भाव र सम्मान कायम राख्न राज्यले जिम्मेवार भूमिका निर्वाह गर्नुपर्ने जोड दिनुभयो ।
उहाँले धर्मलाई राजनीतिक उद्देश्यका लागि प्रयोग गरी सामाजिक सद्भाव खलबलाउने प्रयास स्वीकार्य नहुने बताउनु भयो । धार्मिक आस्था व्यक्तिगत विषय भएकाले त्यसको राजनीतिकरण गरी समाजमा द्वन्द्व र अराजकता सिर्जना गर्ने गतिविधिमाथि सरकारले निगरानी बढाउनुपर्ने उहाँको भनाइ थियो ।
धार्मिक तथा साम्प्रदायिक अभिव्यक्तिका नाममा कुनै पनि समुदायप्रति घृणा फैलाउने गतिविधि रोक्न सरकार सचेत हुनुपर्नेमा जोड दिँदै विश्वकर्माले समयमै आवश्यक कदम चालेर सामाजिक सद्भाव कायम गर्न आग्रह गर्नुभयो ।