काठमाडौँ, ५ साउन । लगातारको वर्षापछि देशका विभिन्न स्थानमा आएको बाढी र पहिरोका कारण सात प्रमुख राजमार्ग पूर्ण रूपमा अवरुद्ध भएका छन् भने १२ राजमार्गमा यातायात सेवा आंशिक रूपमा प्रभावित भएको छ।
सडक विभागका अनुसार हालसम्म अवरुद्ध भएका ५१ सडकखण्ड मर्मत तथा पहिरो पन्छाएर पुनः सञ्चालनमा ल्याइएको छ भने बाँकी सडक खुलाउने काम तीव्र गतिमा भइरहेको छ।
विभागका प्रवक्ता श्यामबहादुर खड्काले अवरुद्ध सडक खुलाउन सम्बन्धित स्थानमा डोजर, एक्साभेटर, लोडरलगायत भारी उपकरण परिचालन गरिएको जानकारी दिँदै यात्राअघि सम्बन्धित निकायबाट सडकको पछिल्लो अवस्थाबारे जानकारी लिएर मात्र यात्रा गर्न सबैलाई आग्रह गर्नुभयो।
नेपाल प्रहरीका अनुसार ललितपुरस्थित कान्तिलोकपथ, इलामको मेची राजमार्ग, खोटाङको दिक्तेल–भोजपुर सडकखण्ड, सिन्धुपाल्चोकको भोटेकोशी गाउँपालिका–४ जुरिखोला (तातोपानी जाने सडक) तथा भोटेकोशी गाउँपालिका–२ कोदारीस्थित अरनिको राजमार्ग पहिरोका कारण पूर्ण रूपमा अवरुद्ध रहेका छन्।
यस्तै, भोजपुर नगरपालिका–५ बोखिमस्थित मध्यपहाडी लोकमार्ग र रसुवाको पासाङल्हामु सडकखण्ड एकतर्फी सञ्चालनमा छन्।
काभ्रेपलाञ्चोक–सिन्धुली जोड्ने बिपी राजमार्गमा सम्भावित बाढीको जोखिमलाई ध्यानमा राख्दै रातिको समयमा सवारी आवागमन रोकिएको छ। उक्त सडकमा बिहान ४ बजेदेखि साँझ ६ बजेसम्म भने सडकको अवस्थाअनुसार सवारी सञ्चालन गर्ने व्यवस्था मिलाइएको प्रहरीले जनाएको छ।
मकवानपुरस्थित कान्तिलोकपथमा पनि बाढी तथा पहिरोको जोखिमका कारण रातिको समयमा सवारी सञ्चालनमा रोक लगाइएको छ।
सडक विभागले मनसुन अवधिभर जोखिमयुक्त सडकहरूको निरन्तर निगरानी गरिरहेको जनाएको छ। अवरुद्ध सडक यथाशीघ्र सञ्चालनमा ल्याउन आवश्यक जनशक्ति तथा उपकरण तयारी अवस्थामा राखिएको विभागले जनाएको छ।
