काठमाडौँ । नेपाल कम्युनिस्ट पार्टी (नेकपा)का नेता तथा पूर्वसभामुख कृष्णबहादुर महराले स्वास्थ्य समस्याका कारण सक्रिय राजनीतिबाट अलग हुने घोषणा गरेका छन्।
बिहीबार विज्ञप्ति जारी गर्दै महराले पार्टीप्रति कुनै असन्तुष्टि वा वैचारिक विचलन नभई स्वास्थ्य अवस्थाका कारण सक्रिय जिम्मेवारीबाट अलग भएको बताएका छन्। उनी ‘एट्रोफी’ सम्बन्धी नसा तथा मांसपेशीको समस्याबाट पीडित छन्।
नियमित उपचार, थेरापी र औषधि सेवनका बाबजुद स्वास्थ्यमा अपेक्षित सुधार नभएकाले पार्टीका गतिविधिमा प्रभावकारी रूपमा योगदान गर्न कठिन भएको उनले उल्लेख गरेका छन्।
४८ वर्षदेखि नेपाली कम्युनिस्ट आन्दोलनमा सक्रिय महराले अब पार्टीको साधारण सदस्यका रूपमा रहने जानकारी दिएका छन्। उनले आफ्नो राजनीतिक यात्रामा साथ दिने सहकर्मी, जनता र परिवारप्रति आभार व्यक्त गर्दै नयाँ पुस्ताका युवाले देशलाई समृद्ध र आत्मनिर्भर बनाउने विश्वास व्यक्त गरेका छन्।
