काभ्रेपलाञ्चोक, असार ४ — स्तरोन्नति भइरहेको अरनिको राजमार्गअन्तर्गत काभ्रेको धुलिखेल–खावा सडकखण्डको पक्की निर्माण कार्य दुई महिनादेखि प्रभावित भएको छ।

गत चैतमा करिब एक महिनासम्म रातिको समयमा आवागमन बन्द गरी तथा दिउँसो एकतर्फी सञ्चालन गरेर कालोपत्रे (डिबिएम–पिच) गर्ने काम सम्पन्न गरिएको थियो। तर बिटुमिन अभावका कारण त्यसयता निर्माण कार्य रोकिएको डिभिजन सडक कार्यालय भक्तपुरले जनाएको छ।

कार्यालयका प्रमुख सिनियर डिभिजनल इन्जिनियर सुमन योगेशका अनुसार धुलिखेल चोकबाट २.५ किलोमिटर सडक दुवैतर्फी रूपमा पहिलो चरणमा पक्की बनाइएको थियो। उक्त सडकमा वैशाखदेखि सबै प्रकारका सवारी साधनलाई दुवैतर्फी सञ्चालनको अनुमति दिइएको छ।

योगेशले बिटुमिन अभावका कारण बाँकी सडक पक्की गर्ने काम तथा पहिलो चरणमा गरिएको डिबिएम कालोपत्रेमाथि ‘अस्फाल्ट’ तह थप्ने कार्यसमेत रोकिएको जानकारी दिनुभयो। उहाँका अनुसार स्तरोन्नति भइरहेको चार किलोमिटर सडकखण्डमध्ये बाँकी दूरी पक्की गर्ने काम वैशाखको पहिलो सातादेखि सुरु गर्ने योजना भए पनि कच्चा पदार्थ अभावका कारण दुई महिनादेखि काम ठप्प छ।

हाल यात्रुलाई सहज बनाउन पक्की गर्न बाँकी सडकखण्डमा खाल्डाखुल्डी पुर्ने कार्य भइरहेको उहाँले बताउनुभयो। बिटुमिन आयात भएपछि बाँकी १.५ किलोमिटर सडक दोस्रो चरणमा पक्की गरिनेछ। यसअन्तर्गत ग्राभेलमाथि २० सेन्टिमिटर बाक्लो सिमेन्ट मिश्रित बेस हाल्ने तथा डिबिएम र अस्फाल्ट गरी दुई चरणमा कालोपत्रे गरिने जनाइएको छ।

लामो समयसम्म निर्माण व्यवसायीको लापरबाहीका कारण रोकिएको सडक विस्तार कार्यका लागि गत कात्तिकमा नयाँ निर्माण कम्पनीसँग सम्झौता भएपछि स्तरोन्नतिको कामले पुनः गति लिएको थियो।

डिभिजन सडक कार्यालयका अनुसार आगामी पुसभित्र काम सम्पन्न गर्ने लक्ष्यसहित सी–एन ए–वान काली जेभीसँग भ्याटबाहेक ३१ करोड ५६ लाख रुपैयाँमा ठेक्का सम्झौता गरिएको छ। कालोपत्रे कार्य सम्पन्न भएपछि सडकको स्लोप व्यवस्थापन तथा अन्य बाँकी सानातिना काम गरिने योगेशले बताउनुभयो।

यसअघि तोकिएको समयमा निर्माण सम्पन्न नगरेको भन्दै कार्यालयले गौरी–पार्वती निर्माण सेवा कम्पनीसँगको ठेक्का रद्द गरेको थियो। सम्झौताको समयसीमा सकिएको ११ महिनापछि पनि २५ प्रतिशत निर्माण कार्य पूरा गर्न नसकेपछि २०८१ फागुन १५ गते उक्त कम्पनीसँगको ठेक्का रद्द गरिएको हो।

उक्त कम्पनीले २०७९ जेठ २० गते २२ महिनाभित्र अर्थात् २०८० चैत १९ गतेसम्म निर्माण सम्पन्न गर्ने गरी ठेक्का लिएको थियो।

धुलिखेल–खावा सडकखण्ड अरनिको राजमार्ग हुँदै नेपाल–चीन उत्तरी नाका तातोपानी तथा छिमेकी जिल्ला दोलखा, रामेछापलगायतका जिल्लातर्फ आवतजावत गर्ने प्रमुख सडकमार्गका रूपमा परिचित छ।