लिमा, ३१ जेठ । पेरुको राष्ट्रपतीय निर्वाचनको मतगणना अन्तिम चरणतर्फ बढ्दै जाँदा वामपन्थी राष्ट्रपति पदका उम्मेदवार रोबर्टो सान्चेजको पक्षमा राजधानी लिमा लगायत विभिन्न स्थानमा हजारौँ समर्थकहरू सडकमा उत्रिएका छन्। मतगणनाको आंशिक परिणामले दक्षिणपन्थी उम्मेदवार केइको फुजिमोरीलाई सामान्य अग्रता देखाएपछि सान्चेज समर्थकहरूले निष्पक्ष मतगणना र जनमतको सम्मानको माग गर्दै प्रदर्शन गरेका हुन्।

गत आइतबार सम्पन्न दोस्रो चरणको निर्वाचनको ९८.५ प्रतिशत मतगणना सकिँदासम्म फुजिमोरीले ५०.०५ प्रतिशत र सान्चेजले ४९.९५ प्रतिशत मत प्राप्त गरेका छन्। एक करोड ८० लाखभन्दा बढी मतगणना हुँदा फुजिमोरी करिब १८ हजार ५०० मतले अगाडि रहेकी छन्।

सान्चेजले शुक्रबार राजधानी लिमासहित केही क्षेत्र र विदेशबाट प्राप्त मतहरूमा अनियमितताको आशंका व्यक्त गर्दै पुनः मतगणनाका लागि संयुक्त आवेदन दिन प्रस्ताव गर्नुभएको थियो। उहाँले निर्वाचन प्रक्रियामा पारदर्शिता र जनमतको सम्मान सुनिश्चित गर्नुपर्नेमा जोड दिनुभएको छ।

शनिबार लिमामा भेला भएका सान्चेज समर्थकहरूले “पेरूवासीको न्याय र सम्मानका लागि” तथा “जनताको मतको सम्मान गर” जस्ता नारासहित प्रदर्शन गरेका थिए। प्रदर्शनकारीहरूले राष्ट्रिय निर्वाचन न्यायाधिकरणको मुख्यालयबाहिर समेत धर्ना र नाराबाजी गरेका थिए।

“हामी विश्वास गर्छौं कि सान्चेज नै वास्तविक विजेता हुनुहुन्छ। जनताको मत र आकांक्षाको सम्मान हुनुपर्छ,” ५७ वर्षीय शिक्षक ड्यानियल सेरोनले एएफपीसँग बताउनुभयो।

निर्वाचन अधिकारीहरूले विवादित मतपत्रहरूको परीक्षण जारी रहेको र कानुनी प्रक्रियाअनुसार अन्तिम नतिजा सार्वजनिक गरिने बताएका छन्। निर्वाचन प्राधिकरणका प्रमुखका अनुसार अन्तिम परिणाम आउन अझै दुई सातासम्म लाग्न सक्छ।

पेरूमा लामो समयदेखि जारी राजनीतिक अस्थिरता, भ्रष्टाचार र शासकीय असफलताबाट आजित आम नागरिकले यस निर्वाचनलाई परिवर्तनको अवसरका रूपमा हेरेका छन्। विगत एक दशकमा आठ जना राष्ट्रपति फेरिएका पेरूमा श्रमिक, किसान, आदिवासी तथा सीमान्तकृत समुदायले सामाजिक न्याय, आर्थिक समानता र राज्यका स्रोतसाधनमाथि जनताको अधिकार सुनिश्चित गर्ने अपेक्षासहित सान्चेजप्रति समर्थन जनाएका छन्।

विशेषगरी ग्रामीण क्षेत्र, खानी मजदुर, कृषि श्रमिक तथा आदिवासी समुदायबीच सान्चेजको लोकप्रियता उल्लेखनीय देखिएको छ। उनीहरूले शिक्षा, स्वास्थ्य, रोजगारी र प्राकृतिक स्रोतको न्यायोचित उपयोगमार्फत बहुसंख्यक जनताको जीवनस्तर सुधार हुने आशा व्यक्त गरेका छन्।

यद्यपि निर्वाचन परिणाम अत्यन्त प्रतिस्पर्धात्मक रहेकाले पेरूको राजनीतिक तथा सामाजिक विभाजन पनि स्पष्ट रूपमा देखिएको छ। एकातिर शहरी तथा आर्थिक रूपमा सम्पन्न क्षेत्रहरू छन् भने अर्कोतिर ग्रामीण, श्रमजीवी र आदिवासी समुदाय परिवर्तनको पक्षमा उभिएका छन्।

अन्तिम परिणाम जे आए पनि यस निर्वाचनले पेरूका श्रमजीवी वर्ग, किसान र वञ्चित समुदायमा नयाँ राजनीतिक चेतना र परिवर्तनको आकांक्षा जागृत गरेको छ। उनीहरूले आफ्नो आवाज राज्यसत्तासम्म पुर्‍याउने र सामाजिक न्यायमा आधारित नयाँ राजनीतिक दिशाको खोजी गरिरहेका छन्।