विराटनगर । नेपाली कांग्रेसका पूर्वमहामन्त्री डा. शशांक कोइरालाले पार्टी हाल विभाजित अवस्थामा रहेको टिप्पणी गरेका छन् । विराटनगरमा आइतबार आयोजित संस्थापनइतर पक्षको भेलामा बोल्दै उनले कांग्रेस एकताको नाममा भए पनि व्यवहारमा टुक्रिएको जस्तो अवस्था रहेको बताएका हुन् ।
उनले पार्टी एकताबद्ध नभएसम्म संगठन सुदृढ हुन नसक्ने उल्लेख गर्दै तत्काल एकताको प्रयास आवश्यक रहेको धारणा राखे ।
कार्यक्रममा बोल्दै कोइरालाले २०४८ सालको राजनीतिक परिवर्तनको स्मरण गर्दै तत्कालीन प्रधानमन्त्री गिरिजाप्रसाद कोइरालाको नेतृत्वको प्रशंसा गरे । उनले अहिलेको कांग्रेसमा एकता कमजोर भएको टिप्पणी गरे ।
उनले भने, “आज कोइराला निवास जाँदा आँखा रसाए । तर अहिले कांग्रेस टुक्रिएको छ, टुक्राइएको हो । अदालतको निर्णयले समेत विभाजनमा भूमिका खेलेको छ, जुन गलत थियो ।”
कोइरालाले कांग्रेसलाई एकताबद्ध बनाउने जिम्मेवारी नेतृत्वले लिनुपर्ने बताउँदै नेता शेखर कोइरालाको भूमिकालाई सकारात्मक रूपमा व्याख्या गरे । उनले पार्टीलाई एकतामा ल्याएर अघि बढाउनुपर्नेमा जोड दिए ।
यसै क्रममा उनले वर्तमान नेतृत्व क्षमताबारे टिप्पणी गर्दै “के गगन थापाले एक्लै पार्टी चलाउन सक्नुहुन्छ ?” भन्ने प्रश्नसमेत उठाए ।
पूर्वमहामन्त्री कोइरालाले कांग्रेसको आधार गाउँ–गाउँसम्म भए पनि त्यसअनुसार मत परिणाम नआएको उल्लेख गर्दै संगठन सुदृढीकरण आवश्यक रहेको बताए ।
कार्यक्रममा कांग्रेस नेता कृष्णप्रसाद सिटौलालगायत नेताहरूको पनि उपस्थिति रहेको थियो ।
