वीरेन्द्रनगर । ८६ वर्षीय वरिष्ठ वामपन्थी नेता देवजङ्ग शाही सम्मानित हुनुभएको छ ।
राष्ट्रिय जनमोर्चाका केन्द्रीय सल्लाहकारसमेत रहनुभएका शाहीलाई २०८३ जेठ ३० गते शनिबार औपचारिक कार्यक्रममाझ सम्मान गरिएको हो ।
राजमो केन्द्रीय उपाध्यक्ष जनकराज शर्माको प्रमुख आतिथ्यमा सम्पन्न सो कार्यक्रमको आयोजना राजमो कर्णाली प्रदेश समितिले गरेको थियो ।
सुर्खेतस्थित राजमो प्रदेश कार्यालयको सभाकक्षमा आयोजित उक्त कार्यक्रममा मन्तव्य राख्दै प्रमुख अतिथि शर्माले शाहीको वामपन्थी आन्दोलनमा निरन्तरता अहिलेको युगमा झनै बढी आदर्श परिघटना भएको जिकिर गर्नुभयो ।
राजमो कर्णालीका अजयबहादुर गिरीले वरिष्ठ नेता शाहीको जीवन र सामाजिक आन्दोलनमा भूमिकाबारे प्रकाश पार्दै स्वागत मन्तव्य राख्नुभएको थियो ।
त्यस्तै राजमो केन्द्रीय सदस्य रत्नविक्रम रानाप्यासी र राजमो नेता कमलविक्रम शाहीले पनि सम्मानित व्यक्तित्वमाथि केन्द्रित रहेर मन्तव्य राख्नुभएको थियो ।
कार्यक्रम राजमो सुर्खेतका सचिव विष्णुप्रसाद शर्माको सञ्चालन तथा प्रदेश समितिका अध्यक्ष पूर्णबहादुर शाहीको अध्यक्षता उक्त कार्यक्रम अघि बढेको थियो ।
कालीकोट जिल्लाको रासकोट गाउँपालिका निवासी वाम बुद्धिजीवी शाही पेसाले शिक्षक हुनुहुन्थ्यो । उहाँको शिक्षक आन्दोलनमा पनि महत्त्वपूर्ण भूमिका रहेको आयोजकले जानकारी दिएको छ ।
आयोजकका अनुसार २०२७ सालदेखि कम्युनिस्ट आन्दोलनमा लाग्नु भएका शाही नेपाल कम्युनिस्ट पार्टीको चौथो महाधिवेशन हुँदै नेकपा (मसाल) मा भूमिगत रूपमा सक्रिय हुनुहुन्थ्यो ।
उहाँ मसाल समर्थित अखिल नेपाल राष्ट्रिय जनमोर्चाको पनि सल्लाहकार रहिसक्नुभएको थियो ।
केही दिनदेखि अस्वस्थ शाहीको उचपार जारी छ ।
