काठमाडौँ । नेकपा (मसाल) का महामन्त्री मोहनविक्रम सिंहले बिनू केसीको निधनलाई सामाजिक क्षति बताउनुभएको छ ।
राष्ट्रिय जनमोर्चा काठमाडौँद्वारा २०८२ कात्तिक २६ गते आयोजित शोकसभामा मन्तव्य पठाउँदै सिंहले सो धारणा व्यक्त गर्नुभएको हो ।
शोकमन्तव्यमा आफू क्यान्सरपीडित भएर पनि त्यसका विरुद्ध आजीवन सङ्घर्ष गरेको बिनूको योगदानलाई सामाजिक महŒवको विषय बताइएको छ ।
यस्तो छ, शोकमन्तव्यको पूर्ण पाठ :
“कमरेड बिनूको निधन हाम्रो परिवारको लागि अत्यन्त दुखद हुनुका साथै सामाजिक दृष्टिकोणले पनि यो निकै दुखद घटना हो । उनी १८ वर्षदेखि क्यान्सरद्वारा पीडित थिइन । त्यो कुरालाई सायद यसरी बताउनु उपयुक्त हुनेछ : उनले करिब करिब पुगनपुग २ दशकसम्म सङ्घर्ष गरिरहेकी थिइन र यति लामो समयसम्म त्यसमाथि विजय प्राप्त गरेकी थिइन् । लामो समयसम्म क्यान्सरमाथि क्यान्सरका विरुद्ध सङ्घर्ष गरेर त्यसमाथि विजय प्राप्त गर्नु सामान्य कुरा थिएन ।
उनी क्यान्सरका विरुद्ध व्यक्तिगत रूपले मात्र सङ्घर्ष गरेकी थिइन् । त्यो सङ्घर्षलाई उनले सामाजिक रूपमा पनि दिएकी थिइन् । उनी क्यान्सरपीडित बिरामीको एउटा संस्थामा आबद्ध थिइन् । त्यो संस्थाको माध्यमद्वारा उनले सबै क्यान्सरपीडित बिरामीलाई पनि शिक्षा वा प्रेरणा दिने कार्य गरिरहन्थिन । क्यान्सरपीडित बिरामीको मुख्य समस्या के हो भने उनीहरूले जीवित रहने आशा धेरै गुमाइसकेका हुन्छन् र जीवनप्रति उनीहरूमा धेरै नै निराशाको भाव पैदा भएको हुन्छ । उनले त्यस्ता सबै बिरामीलाई जीवनप्रति उनीहरूमा धेरै नै निराशाको भाव पैदा भएको हुन्छ । उनले त्यस्ता सबै बिरामीलाई जीवनप्रति आशाको सञ्चार गर्ने काम गरिरहेकी हुन्थिन । त्यो सामान्य कुरा थिएन । त्यसरी उनले क्यान्सरका विरुद्धको सङ्घर्ष खालि व्यक्तिगत मात्र नभएर त्यसले सामाजिक रूप पनि लिएको थियो । त्यस अर्थमा उनको मृत्युलाई हामी एउटा सामाजिक क्षतिको रूपमा लिनुपर्दछ । उनको मृत्युबाट सबै क्यान्सरका बिरामीले आफ्नो एउटा मित्र र जीवनको साथीलाई पनि गुमाएका छन् ।
उनको जीवनको अर्काे महत्त्वपूर्ण पक्ष के हो भने लामो समयसम्म क्यान्सरलाई एक प्रकारले मृत्युका विरुद्ध सङ्घर्ष गरेको अवस्थामा पनि उनी सम्पूर्ण समाज व्यवस्थामा आमूल परिवर्तन गर्ने महान् कार्यमा आफूलाई संलग्न थिइन् । त्यस्तो अवस्थामा धेरै मानिस निराश हुन्छन् तर उनले जीवनको त्यस प्रकारको कठिन अवस्थालाई पनि उनी नेकपा (मसाल) सित संलग्न भएर पार्टीको काममा सक्रिय हुने गरेकी थिइन् । उनी नेकपा (मसाल) को काठमाडौँ जिल्ला कमिटीअन्तर्गत एउटा नगर कमिटीको सदस्य थिइन् । त्यसरी पार्टीको काममा भूमिगत रूपले उनी पूरै सक्रिय हुने गर्दथिन् । यसरी उनको मृत्युबाट पार्टीलाई पनि धेरै क्षति पुगेको छ ।
व्यक्तिगत रूपमा उनी मेरो छोरा नेकपा (मसाल) को बागमती प्रदेशको प्रवक्ता का. समीर सिंहको पत्नी र मेरो बुहारी पनि थिइन् । त्यसरी उनको मृत्युबाट हाम्रो परिवारलाई पनि धेरै दु:ख पुगेको छ । अन्तमा नेकपा (मसाल) ले उनीप्रति उच्च सम्मान प्रकट गर्दै उनलाई श्रद्धाञ्जली दिन्छु ।”
