विश्व फुटबलको सर्वोच्च निकाय फिफाले बुधबार अफगानिस्तानको शरणार्थी महिला फुटबल टिमले अन्तर्राष्ट्रिय फुटबलमा ‘डेब्यु’ गर्ने जनाएको छ ।
अन्तरराष्ट्रिय फुटबलको सर्वोच्च निकाय फिफा काउन्सिलले देश भित्र र बाहिर महिला खेलाडीहरूलाई सहयोग गर्ने प्रयासको एक भागको रूपमा मे महिनामा शरणार्थी टोली गठन गर्न स्वीकृति दिएको थियो।
अफगानिस्तानले अक्टोबर २३–२९ मा दुबईमा हुने प्रतियोगितामा आयोजक युएई, चाड र लिबियाको महिला टोलीसँग सहभागिता जनाउने छ।
फिफाका अध्यक्ष जियानी इन्फान्टिनोले भन्नुभयो, “सबै महिलाको फुटबलमा पहुँच सुनिश्चित गर्नु फिफाको प्राथमिकता हो र यो नै हाम्रो खेलको भविष्य निर्माण गर्ने महत्वपूर्ण पक्ष हो ।”
अमेरिका समर्थित सरकारलाई अपदस्थ गरेपछि तालिबान अधिकारीहरू अफगानिस्तानमा चार वर्षदेखि सत्तामा फर्किएका छन् र विशेष गरी महिलाहरूमाथिको व्यवहारका लागि र अन्य मानवअधिकार रेकर्डका लागि उनीहरूको अन्तर्राष्ट्रियस्तरमा आलोचना भएको छ।
अफगानिस्तानमा अधिकांश महिला र बालिकाहरूलाई शिक्षा र काममा प्रतिबन्ध लगाइएको छ र उनीहरूलाई पार्क र जिममा जानसमेत प्रतिबन्ध लगाइएको छ।
स्कटल्याण्डका प्रशिक्षक पाउलिन ह्यामिलको नेतृत्वमा अफगान टोलीले इङ्ल्यान्ड र सिड्नीमा खेलाडीहरू छनौट गर्न ‘प्रतिभा परिचय शिविर’हरू सञ्चालन गरेको छ।
