जयपुर । मूल प्रवाह अखिल भारत नेपाली एकता समाज उत्तर एवम् दक्षिणले ७ सेप्टेम्बर २०२५ का दिन महिला विभागकी सदस्य लक्ष्मी थापाकी छोरी एवम् कलाकार प्रियांका थापाको सम्झनामा श्रद्धाञ्जली सभा सम्पन्न गरेको छ ।
३० अगस्त २०२५ का दिन मृगौला सम्बन्धी रोगबाट पीडित १७ वर्षीय प्रियांका थापाको कलिलो उमेरमै निधन भएको थियो । उहाँको निधन भएको नवौँ दिनको दिन सो श्रद्धाञ्जली सभा सम्पन्न भएको हो ।
बाबुराम थापाको सञ्चालन र मङ्गलसिंह खड्काको अध्यक्षता ग्रहणपछि प्रियांका थापाको सम्झनामा एक मिनेट मौनधारण गरिएको थियो । तत्पश्चात् मूल प्रवाह अखिल भारत नेपाली एकता समाजका केन्द्रीय सदस्य बेलबहादुर रजाली, केन्द्रीय प्रतिनिधि रिम राना, पश्चिमोत्तर क्षेत्रीय उपाध्यक्ष ओम थापा, पश्चिमोत्तर क्षेत्रीय सदस्य नारायण ज्ञवाली, पश्चिमोत्तर क्षेत्रीय सदस्य टंक बहादुर थापा, विद्यार्थी केन्द्रीय सदस्य साक्षी थापा लगायत विभिन्न व्यक्तित्वहरूले प्रियांका थापाको सम्झनामा पुष्प अर्पण तथा शोक मन्तव्य व्यक्त गर्नुभएको थियो ।
शोक मन्तव्यको क्रममा सबैले यसरी कलिलै उमेरमा यो संसार छोडेर जानुपरेकोमा गहिरो दुःख व्यक्त गर्नुभएको थियो । उपस्थित सबैजनाले पुष्प अर्पण गरेर प्रियांका थापाप्रति श्रद्धाञ्जली व्यक्त गर्नुभएको थियो ।
पाल्पा जिल्ला रैनादेवीछहरा गाउँपालिका १ असारे निवासी मूल प्रवाह अखिल भारत नेपाली एकता समाज जयपुर उत्तरका पूर्व नगर सदस्य रवि थापा एवम् महिला विभाग सदस्य लक्ष्मी थापाकी कान्छी छोरी प्रियांका थापा एक कलाकार पनि हुनुहुन्थ्यो ।
