काठमाडौं । राष्ट्रिय जनमोर्चाका उपाध्यक्ष दुर्गा पौडेलले नेपाली जनताले देशभित्र वा अन्तर्राष्ट्रिय जगतमा जहाँसुकै अन्याय भएपनि नसहने बताउनुभएको छ ।
प्यालेस्टाइनीमाथि इजरेलले गरेको नरसंहारविरुद्ध सोमबार राजधानीको शान्तिवाटिकामा आयोजित हस्ताक्षर संकलन अभियानको प्रारम्भ गर्दै पौडेलले यस्तो बताउनुभएको हो ।
‘नेपाली जनताको इतिहास साक्षी छ जहिले पनि चाहे त्यो अन्तर्राष्ट्रिय आन्दोलन होस् वा नेपालभित्रको आन्दोलन होस्’ उहाँले भन्नुभयो, ‘अन्यायको विरुद्ध दृढ भएर धावा बोल्ने नेपालीको इतिहास छ ।’
उहाँले पार्टीको तर्फबाट प्यालेस्टाइनी जनताको पक्षमा हुने सबैखाले आन्दोलनप्रति ऐक्यवद्धता जाहेर गर्नुभयो ।
हस्ताक्षर संकलन अभियान पनि आन्दोलनको एउटा रुप हो भन्दै इजरायललाई दबाब दिन यो अभियानमा साथ दिन सबैसँग आग्रह गर्नुभयो ।
पौडेलले भन्नुभयो, ‘हस्ताक्षर संकलन पनि आन्दोनको एउटा रुप हो । यो आन्दोलन, हाम्रो लडाईं प्यालेस्टाइनी जनताको मुक्तिको निम्ति उनीहरुमाथि भएको ज्यादती रोक्नको निम्ति हो।’
नेकपा (मसाल) सहित विभिन्न वामपन्थी दल तथा नागरिक समाजका अगुवाहरूले प्यालेस्टाइनमाथि इजरायलले गरिरहेको आक्रमणविरुद्ध एक महिनासम्म हस्ताक्षर अभियान सञ्चालन सुरु गरेका हुुन्।
आज रत्नपार्क शान्तिवाटिकाबाट सुरु भएको हस्ताक्षर संकलन अभियान एक महिनासम्म चल्ने ‘प्यालेष्टिनीहरुमाथि इजरायलबाट भइरहेको जनसंहारविरुद्ध संयुक्त अभियान, नेपाल’ले जनाएको छ ।
प्यालेस्टाइनीमाथि मानवताविरोधी युद्ध अपराध भएको छ : प्रवक्ता पुरी (भिडिओ)
