दाङ । भारतले नेपाल सरकारसँग सरोकारै नराखी नेपाली भूमि हुँदै चीनको मानसरोवरसम्म जाने बाटो निर्माण गरी उद्घाटन गरेको विरोधमा २०७७ वैशाख ३० गते घोराहीमा विरोध कार्यक्रम सम्पन्न भएको छ ।
कार्यक्रमलाई सम्बोधन गर्दै राजमो दाङका अध्यक्ष गणेश आचार्यले सरकारको अगुवाइमा कूटनैतिक पहल र वार्ता मार्फत् आफ्नो भूमिको रक्षा गर्नुपर्ने बताउनुभयो । नेपालको सीमा कालीनदी भएको र त्यसयता नेपालसँग सरोकारै नगरी बाटो निर्माण गरेर भारतले नेपालको राष्ट्रियता र स्वाधीनतामाथि धावा बोलेको हँुदा सम्पूर्ण नेपाली एक भएर त्यसको प्रतिरोध गर्नुपर्नेमा जोड दिनु भयो । प्रहरी अवरोधबिच भएको उक्त कार्यक्रममा यसरी रोगको सङ्क्रमण हुन सक्ने जटिल अवस्थामा सडकमा आएर बोल्न रहर नभएर देशको मायाले बाध्य भएको उहाँको भनाइ थियो ।
कार्यक्रममा नेकपा (क्रान्तिकारी–माओवादी) का जिल्ला सेक्रेटरी रामजी थारू र नेकपा (माले) दाङका सचिव नेत्रप्रकाश पाण्डेलगायतले मन्तव्य राख्नुभएको थियोे भने कार्यक्रमको सञ्चालन राष्ट्रिय जनमोर्चाका जिल्ला सदस्य सुशील पोख्रेलले गर्नुभएको थियोे ।
कार्यक्रमको आयोजना दाङका नेकपा (मसाल), राष्ट्रिय जनमोर्चा, नेकपा (माले), नेकपा (क्रान्तिकारी–माओवादी) र देशभक्त जनगणतान्त्रिक मोर्चाले गरेका थिए ।
