कृष्ण केसी, चितवन ।
राष्ट्रिय जनमोर्चा चितवनले माडी नगरपालिका वशन्तचोक बजारमा रक्तिमको सांस्कृतिक अभियानको कार्यक्रमसहित सभा सम्पन्न गरेको छ ।
राजमो केन्द्रीय सदस्य राजेन्द्र ढुङ्गानाको प्रमुख आतिथ्यमा २०८१ जेठ ५ गते बरुवाचोकमा उक्त कार्यक्रम सम्पन्न भएको हो ।
सो अवसरमा मन्तव्य राख्दै ढुङ्गानाले देशमा विद्यमान बेथिति, करवृद्धि, भ्रष्टाचार, मानव तस्करी, महङ्गी, सहकारीको रकम हिनामिना, सुनकाण्डलगायतको विषयमा धारणा राख्नुभएको थियो ।
‘देशभित्रका यी गतिविधिले अन्तर्राष्ट्रिय रूपमा नै नेपाल र नेपालीको बद्नाम भएको छ’ उहाँले भन्नुभयो– ‘यस्ता व्यक्तिलाई बारम्बार भोट हालेर पठाउनुमा हामी जनताको पनि कमजोरी रहेको छ ।’
उहाँले आगामी समयका चुनावमा जनता सचेत हुनुपर्ने आवश्यकतामा जोड दिनुभयो ।
नेकपा (मसाल) चितवनका प्रवक्ता भविश्वर शर्मा, राजमो जिल्ला अध्यक्ष अमरबहादुर क्षेत्री र राजमो बागलुङका वीरेन्द्र थापाले पनि उक्त कार्यक्रममा मन्तव्य राख्नुभएको थियो ।
कार्यक्रममा राजमो केन्द्रीय सदस्य देवी शर्मा, रक्तिमका उपाध्यक्ष मोहराज चालिसे, अखिल नेपाल ट्रेड युनियन महासङ्घ (अन्टुक) का केन्द्रीय सदस्य डम्बर केसी र अखिल नेपाल महिला सङ्घ चितवनकी कोषाध्यक्ष सीता क्षेत्रीको आतिथ्य रहेको थियो ।
यादवविलास पन्तको सञ्चालन तथा महेन्द्रप्रसाद देवकोटाको अध्यक्षतामा अघि बढेको उक्त कार्यक्रममा रक्तिम र विष्णु पौडेलले स्वागत गर्नुभएको थियो ।
