काठमाडौं । बागमती प्रदेशका मुख्यमन्त्री शालिकराम जम्कट्टेलले मन्त्रालयको संख्या थपेर १३ पुर्याएका छन् ।
बिनाविभागीय मन्त्री रमा आलेमगरलाई मन्त्रालयको जिम्मेवारी दिन मुख्यमन्त्रीले मन्त्रालय थपेका हुन् ।
बुधबार बसेको मन्त्रिपरिषद् बैठकले उनलाई युवा तथा खेलकुद मन्त्रालयको जिम्मेवारी दिइने निर्णय गरिएको प्रदेश सरकारका प्रवक्ता गंगा नारायण श्रेष्ठले बताए ।
आलेमगरलाई जिम्मेवारी दिनका लागि सामाजिक विकास मन्त्रालय फुटाएर युवा तथा खेलकुद मन्त्रालय बनाइएको बताइएको हो।
यो सँगै बागमतीमा मन्त्रालयको संख्या १३ पुगेको छ।
१९ चैत २०८० मा बिनाविभागीय मन्त्री नियुक्त भएकी आलेमगर मुख्यमन्त्री जम्कट्टेलले सदनबाट विश्वासको मत लिने प्रयोजनका लागि बोलाइएको प्रदेश सभा बैठकमा उनले तीन घण्टा ढिलो गरेकी थिइन्। दिउँसो १ बजेका लागि बोलाइएको बैठक उनकै कारण ४ बजेका लागि सारिएको थियो।
काठमाडौं निर्वाचन क्षेत्र १० (ख) बाट नेकपा एकीकृत समाजवादी पार्टीबाट निर्वाचित उनले ४४ दिनपछि विभागीय जिम्मेवारी पाएकी छन्।
