काठमाडौं । आमाको मृत्यु भएको ६ दिनपछि दार्चुला शैल्यशिखर नगरपालिकाका बासुदेव भट्ट घर आउन पाएका छन् । लकडाउनका कारण धार्चुलाको क्वारेन्टिनमा रहेका बासुदेवलाई आइतबार नेपाल प्रवेश गराइएको हो ।

सीमा बन्दका कारण धार्चुलाको क्वारेन्टिनमा बसेका बाशुदेवकी आमाको ६ दिन अघि निधन भएको थियो । तर, महाकाली पुलको ढोका नखोलिदिँदा उनी ६ दिनदेखि भारतमै आमाका किरिया बसेका थिए ।

दुवै देशमा लकडाउन भएपछि जो जहाँ छन् त्यहीँ रहने भन्दै लकडाउनपछि आएका सीमामा अलपत्र नेपालीहरुलाई प्रवेश दिइएको थिएन । प्रवेश नदिएपछि सीमा पारी नै रहेका बेला भट्टकी आमाको निधन भएको थियो ।

जिल्ला प्रहरी कार्यालय दार्चुलाका अनुसार दुवै देशको समन्वयमा महाकालीको ढोका खोली उनलाई नेपाल प्रवेश गराइएको हो ।